Komo reakshon riba un karta di diputado Nina den Heyer, minister Arie Slob (medionan di komunikashon) a disidí pa por lo pronto prolongá e sosten pa medionan informativo di Boneiru ku 6 luna. Pa e sektor di medionan di komunikashon (profeshonal) na nos isla e ministerio a reservá un suma di $ 106.000,–, asina e mandatario a konfirmá den un karta pa e diputado.
‘Awor aki tambe ta i ta keda importante ku medionan di komunikashon – korant, radio, televishon i plataformanan ‘online’ – por keda ehersé nan trabou adekuadamente. Ta un konekshon indispensabel den un komunidat demokrátiko. Pa e motibu aki tambe mi a disidí ku un prolongashon di e sosten pa e sektor di medionan di komunikashon na Boneiru ta nesesario’, segun minister Slob.
Diputado Den Heyer ta kontentu ku e reakshon aki. El a pidi e mandatario pa sosten pa organisashonnan kultural na Hulanda Karibense tambe, ku komo konsekuensia di e krísis di corona ta konfrontando problema finansiero. E medidanan di sosten ku anteriormente gabinete a anunsiá pa sektor kultural ta sinkronisá ku e situashon na Hulanda Oropeo i p’esei nan no ta ehekutabel na e islanan BES.
Den Heyer: ‘Den mi karta mi a enfatisá ku kultura, banda di naturalesa i ekonomia, ta un pilá importante pa nos komunidat boneriano. Minister Slob a kontestá ku su kolega Ingrid van Engelshoven ta trahando riba un prolongashon di e pakete di sosten aktual i ku na momentu di elaborashon di esei ta tene kuenta ku situashon di e sektor kultural na Boneiru. Mi tin tur konfiansa den esei i – huntu ku nos organisashonnan kultural – mi ta anhelando e resultado.’