MAN-PIN niun momento ta kontra desaroyo di pais. Pero politikonan mester stòp di kere ku
nan por tuma pueblo hasi. MFK a priminti ku den 3 luna ta habri refineria i awe ta pusha den
stoma di pueblo un kontrato di 30 aña pa blend produkto só i konsekuentemente no ta bai
refina krudo i traha produkto manera e.o gasolin, gasoil, jetfuel etc. Ku otro palabra no ta
bai start e unidat kual ta kurason di refineria esta Cat Cracker i plantanan asosia.
Na 2013 Parlamento a pasa un moshon kaminda Gobièrno mester informá parlamento riba
kada paso di desaroyo rondo di refineria. Posishon firme di MFK den oposishon tabata ku no
ta pèrmiti pa separa Bullenbaai foi Operashon di Emmastad i esun ku kier Bullenbaai mester
demostra prome ku e por opera Emmastad. Pero awe ku MFK den Gobernashon no ta bai
start niun planta na Emmastad refina krudo i traha produkto final. Pasombra ta duna Oryx 3
aña pa studia si ta bai start refinashon na Emmastad, pero Oryx ta haña Bullenbaai pa e
traha plaka.
Trahado
Oryx ta bai tuma trahado kual ta den servisio awor aki. E loke a priminti dor di laga 3000
hende pa inskribi pa haña trabou a keda awe den promesa falsu. E echo ku ta bai blend no
tin mester e mesun kantidat di trahado ora ta bai refina produkto.
Akusashon
MAN-PIN den Gobièrnu no a sera ningun refineria. Ta gobernashon anterior a disidi ku no ta
prolonga e kontrato ku PDVSA ora ku esaki termina 31 desèmber 2019. Na fin di 2019 ora a
ofrese PDVSA 6 luna pa kontinua i ku posibilidat di prolongashon ku 6 luna mas, PDVSA a
ninga esaki.
Athunto nos ta manda un rekapitulashon di henter e proseso di refineria pa duna
aklarashon.
MFK mester stòp di tira falta riba otronan pa a logra algu ku no ta loke a priminti e pueblo
aki. Ainda MFK tin asina tantu kurashi di skohe pa no informá pueblo, pa no informá
parlamento riba loke a keda firma. Den e kaso aki nos por mira kon èks minister presidente,
aktual minister van staat sra Maria Liberia-Peters(PNP) a mustra bon kla ku e loke ta bezig
kun’e ta kontra Bon Gobernashon.
Sentral Sindikal, Sindikato di trahadonan di Kontratista tambe a ekspresá nan preokupashon
mirando ku loke a keda firma no ta loke a priminti pueblo paso ku e kontrato riba mesa ta
final di refinashon na Kòrsou.
