Despues di su combersacion cu Minister di Asunto Economico, Comunicacion y Desaroyo Sostenibel mr. Geoffrey Wever riba e proposicion a bin cu un “Business Summit”, Minister Plenipotenciario mr. Ady Thijsen a papia cu director di Departamento di Asuntonan Economico (DEZHI) Maria Dijkhoff-Pita. Den e reunion aki e proposicion a bin dilanti unda a bisa cu e “Business Summit” no ta unicamente pa Hulanda, pero tambe mester por mira si por haya interes di otro paisnan Europeo. Sra. Dijkhoff-Pita a bisa cu actualmente nan ta trahando riba e proposicion pa e “Business Summit” pa Minister Wever y cu esaki lo keda cla den e prome siman di juni. Na momento cu Conseho di Minister bai di acuerdo cu e proposicion aki lo ta e intencion pa tene e “Business Summit” na final di luna di September. Den e proceso aki segun sra. Dijkhoff-Pita lo tin un rol importante pa Arubahuis pa sondea localidad y tambe pa yuda na compila e lista di companianan y organisacionnan di sector priva pa e lista di invitado pa e evento aki.
Tambe director di DEZHI a bisa cu Aruba a traha un website Invest in Aruba cu ta duna guia na inversionistanan riba posibilidad pa inverti na Aruba.
Riba diversificacion di economia di Aruba Minister Thijsen a trece dilanti e sector primario, cu mester ta dirigi pa brinda e cunukero e oportunidad pa bira entrepreneur. Den esaki ela menciona e oportunidad cu tin via di Surnam, cu ta un pais cu hopi tereno pa planta. Esaki ta duna Aruba e posibilidad pa trece e materia prima Aruba y akinan procesa esaki na producto final. Un ehempel ta cosecha papaya na Surnam y trece Aruba pa eynan traha pica di papaya, cu por bira un producto di exportacion pa Aruba. Pa loke ta Surnam minister Thijsen a menciona tambe cu e tabata tin combersacionnan cu un grupo di comerciante di origen Surnameño na Hulanda cu a mustra interes pa exporta via Aruba.
Sra. Dijkhoff-Pita a papia di e mision commercial cu pronto lo tuma lugar na Colombia y cu un punto cu sigur ta riba agenda ta e parti logistico di Colombia y Aruba.
Minister Thijsen a informa sra. Dijkhoff-Pita di e Conferencia Ministerial di OCTA cu lo tuma lugar na 2024 na Aruba. Por ultimo Minister Thijsen a sigura director di DEZHI Maria Dijkhoff-Pita cu e por conta cu sosten di Arubahuis pa promove e maneho economico di Aruba na Hulanda y tambe pa yuda organisa e “Business Summit” na Hulanda.