KRALENDIJK,Bonaire
E siman aki Kolegio Ehekutivo di Boneiru a disidí pa nombra Tim Muller komo sekretario insular. Entrante 1 di mei Muller, kende ainda ta sekretario insular na Saba, ta kuminsá ku su trabou na Boneiru.
Muller a okupá diferente funshon na Hulanda: na e siudat Den Haag komo direktor general di e servisio di Asuntunan Públiko, na Amsterdam komo direktor athunto di e servisio di Desaroyo Sosial, na e ofisina di kònsùltent Twynstra Gudde i na ministerio di Asuntunan Interno.
Muller: ‘Huntu ku mi kasá Yvonne i nos yu muhé Jessye na aña 2015 mi a bini Karibe for di Hulanda. Nos tur dos ta di desendensia sürnam i ta bon pa ta den e region aki atrobe. Despues di mi temporada na Saba mi ta anhelá pa traha duru riba desaroyo mas aleu di Entidat Públiko Boneiru. Gustosamente mi ke sera konosí pronto ku mi koleganan i tur otro hende ku huntu ta yuda edifiká un mihó Boneiru.
Despues ku e funshon di sekretario insular a bira vakante entrante 1 di novèmber pa motibu di nombrashon di Nerry Gonzalez komo ‘kwartiermaker deelnemingen’, Kolegio Ehekutivo a kuminsá buska un susesor ku por kontribuí aktivamente na realisashon di e ambishonnan di Kolegio Ehekutivo manera nan ta formulá den Programa di Gobernashon i na fortifikashon di e aparato gubernamental manera ta stipulá den Akuerdo Intergubernamental.
‘Nos ta para dilanti desafionan grandi, entre otro eliminashon di retraso i pa e motibu ei nos ta kontentu ku nos por a haña un kandidato ku un trayektoria probá komo profeshonal den servisio públiko ku na mes momentu tin afinidat grandi ku Hulanda Karibense i ku sa na unda nos prioridatnan ta’, segun Kolegio Ehekutivo.
