ORANJESTAD, Aruba
Lider di Fraccion di POR, Dellanire Maduro durante conferencia di prensa a comenta cu den ultimo simannan aki el a haci entrega di diferente pregunta na mandatarionan relaciona cu situacionnan actual di Covid-19 cu ta tumando luga na nos isla.
Dia 11 di augustus 2020 el a manda un total di 23 pregunta pa Gobierno relaciona cu Covid-19. Mirando cu segun ta hayando mas informacion di expertonan, maneho por adapta y como Parlamento, cu ta representante di pueblo, ta importante pa nan tambe ta informa di e cambionan. E ta keda pendiente pa ricibi e respuestanan riba e preguntanan haci.
Dia 17 di augustus 2020 net prome cu a haci e anuncio cu a cambia e fecha di apertura di scol pa 3 di september, Dellanire Maduro a entrega un total di 30 pregunta pa por tin un miho entendimento como Parlamento con e crisis team ta hinca den otro, e organograma di e klusternan y pa tin mas claridad pa compronde con e toma di decisionnan, informacionnan y consehonan ta wordo tuma. Esaki pa conta cu e informacion y tambe como representante di pueblo por duna un input.
Maduro a pone enfasis riba e parti di enseñansa mirando e reto mundial cu esaki ta trece, specialmente e parti di enseñansa digital, cual ta uno cu tur hende mester prepara pe. Teniendo na cuenta esaki lo kier sa por ehempel si na momento cu un mayor laga su yiu sigui enseñansa digital y na mitad caminda e dicidi di manda su yiu scol bek, con esaki lo tuma luga? Unda e mayornan por acudi pa haya sa cua tipo di educacion online ta wordo reconoci pa Departamento di Enseñansa?
Tambe ta importante pa sa con ta percura pa siguridad di hoben y maestro teniendo na cuenta e diferencia di edad y riesgo cu tin segun categoria di edad pa contagio?
Otro pregunta ta: cuanto muchanan menor di 12 aña a wordo getest, cuanto di nan a test positivo, cuanto di nan a presenta sintomanan y cual ta e sintomananan di mas frecuente den mucha aki na Aruba?
Finalmente Dellanire Maduro a menciona cu a entrega un lista di 25 pregunta enfocando entre otro riba e lista di informacion confidencial cu a leak. Entre e preguntanan tin por ehempel ki tipo di programa e departamento ta uza? Esaki pasobra tin diferente programa unda por ehempel mester login of uza un token of password pa haya acceso. Tambe si e programa tin un time frame cu ta log bo out automaticamente? Igualmente si e programa aki ta brinda un lista di e usuarionan cu a haci uzo di dje den ultimo dianan? Tambe ta importante pa sa si e informacion cu a leak a sali internamente of a wordo gehack?
Lider di Fraccion di POR ta keda en espera di e respuestanan di e respectivo mandatarionan pa asina por tin mas claridad como representante di pueblo di e situacionnan den cual nos isla ta pasando na e momentonan aki.
