Dia 13 di juli 2023 e fundacion Sociaal Fonds Colegio Nigel Matthew (SFCNM) a bira un realidad ora cu a firma e statutonan na oficina di notario Helmeyer. E fundacion ta registra den e registro di Camara di Comercio di Aruba y ta cumpli cu tur aspecto legal necesario.
E intencion di e fundacion ta pa yuda e studiantenan di Colegio Nigel Matthew (havo/vwo) cu tin retonan financiero pa adkeri material necesario pa nan estudio, pa asina enfoca mihor riba nan estudio pa termina nan scol cu exito. Hopi di nos profesionalnan, cu a yega di bishita e scol aki cu a habri como un dependance di Colegio Arubano na San Nicolas na 1977, awe ta ocupa posicionnan clave den nos comunidad y den exterior. E dependance a cuminsa bou di maneho di meneer Nigel Matthew te cu 2002. Studiantenan y mayornan tin aprecio pa y ta contento cu e scol por a yega na derecho di su existencia te cu awe.
Sin embargo tanto e docentenan como alumnonan ta consciente cu hopi famia ta pasa trabou tambe y cu mas y mas debi na carencianan económico e studiantenan ta haya contratiempo pa por sigui nan estudio door di preocupacionnan basico.
E directiva, kendenan alabes ta e fundadornan di “Sociaal Fonds Colegio Nigel Matthew” ta consisti di: Silvia Magaly Maduro (Presidente), Hubert Goedgedrag (Vice-presidente), Maria Cristina Laclé, (Tesorero), Susana Maduro (Secretaris), Rosa Antonia Sneek (Miembro di Directiva), Miklos Petronia (Miembro di Directiva) y U.D. Nigel Matthew (Miembro di Directiva). Pa tur esnan cu a yuda den e fase inicial aki, e fundacion ta gradici e donantenan cu te cu awor ta individual.
Peticion ta bai na prome instancia na tur esnan cu a bai “Colegio Arubano Dependance te San Nicolas/Colegio Pariba/Colegio San Nicolas” y cu tin aprecio pa loke e scol a logra te cu awor, pa contribui na e fundacion aki pa por realisa tur e metanan di e studiantenan cu potencial y cu mester ayudo.
Den e proximo lunanan lo sigui diferente actividadnan pa recauda fondo. Ta bai promove diferente aspecto y ta introduci un Facebook Page y Website cu informacion cu lo keda anuncia pronto, cu mas informacion tocante di e plannan.
Cualkier persona of grupo, ex-alumnonan, ex-docentenan cu ta desea di haci un donacion por haci esaki riba cuenta di banco di Stichting Sociaal Fonds Colegio Nigel Matthew (SFCNM).
Aruba Bank N.V. nr. 7512410190
Hunto nos por yuda e hobennan aki pa enfrenta parti di e retonan financiero y logra termina nan estudio sin preocupacion di loke ta basico pa nan studia.