Mas o menos den oranan tempran di diaranson anochi Alberto Groeneveld a post riba su cuenta di Facebook cu e ta den libertad.
Den mensahe cortico e ta gradici tur esnan cu a sigui kere den dje y a critica esnan cu a conden’e prome cu haya sa mas di loke a pasa den e caso di extorsion, sexting, y labamento di placa. E caso aki a wordo anuncia diabierna ultimo door di autoridadnan cu a bisa cu a detene cuatro persona y a confisca un suma grandi di placa.
Según información cu esnan rond di dje a suministra, Groeneveld aparentemente a wordo wanta door di Polis ora cu el a bay entrega keho.
Na momento cu el a entrega keho, aparentemente no tabata sa ki rol el a hunga exactametne y a dicidi di want’e pa e contesta pregunta di autoridadnan cu tabata kier a haya sa mas con e caso aki ta hinca den otro. Y amigonan ta bisa cu e hecho cu el a wordo laga liber caba ta indica cu e no tin ningún rol den e caso grandi aki cu ainda ta bou di investigación.
E grupo di persona stranhero combina cu localnan tabata trata di contact hendenan den comunidad cu tin placa pa basila nan y después pidi nan potret den forma sexual. Y ta e potretnan aki e organización criminal tabata uza pa extorsiona e personanan y a logra saca minimo 100 mil florin, cu a wordo confisca.
Aunke cu a laga Groeneveld liber, e investigación ta sigui pasobra aparentemente tin mas hende cu ta forma parti di e organización criminal.
Informacion no official cu EA News a ricbi ta cu Alberto Groeneveld ta un di e victimanan rond di e propio grupo cu ta yama nan mes su “Amigonan” cu tabata chantahe sin cu e mes tabata sa cu ta nan. Sinembargo e la dicidi di pone un stop cu esaki y e mes a bay haci un keho oficial di loke e ta pasando aden cu tur e consecuencianan cu e situacion a bin cu ne. Manera e mes ta bisa e lo sigui semper comparti alegria.
