Ku e aktividat Chispa di Wan ku Pedu a habri e temporada di San Juan i San Pedro. E aña akí a skohe pa kuminsá fiesta den e bario di Nort’i Saliña. Durante e anochi akí a honra tres baluarte di bario. Nan a risibí e rekonosementu Flambeu di Kandela di e Chispa di Wan i Pedu. E rekonosementu aki a bai pa Mourens Mouchi Evertsz, Iselsio Echo Statie i Cornelis Payo Thielman. E aktividat ta bini bèk tur aña di nobo i ta na enkargo di Departamento di Kultura (SKAL).
Durante e Chispa di Wan ku Pedu a forma un grupo di músiko di bario pa e parti di animashon bou di kordinashon di Eddy Thielman. Nan presentashon ta parti di un dokumental ku ta pasa di 24 te ku 29 di yüni na televishon lokal. Den presensia di un grupo chikitu di invitado, hefe di SKAL Papito Thomas, direktora di Direktorado Komunidat i Kuido, Silvana Janga-Serfilia a dirigí palabra, miéntras ku diputado Hennyson Thielman a papia na nòmber di Entidat Públiko Boneiru.
E orígen di e fiestanan di San Juan i San Pedro tabata unu religioso. Awor nan ta mas un enkuentro kultural. Durante e fiestanan ta toka kantikanan krioyo ku marimba, wiri, barí, karkó, kuarta i triangel. Tambe ta bula kandela. E bulamentu ta bai di nort pa sùit. E nifikashon di e bulamentu di kandela ta purifikashon. Hubert Vis, ku sa hopi di nos kultura, a bisa: “Kandela ta kima i hasi kos limpi. E ta limpia bo alma i limpia tur kos pa un mihó futuro”.
Selebrashon di San Wan i San Pedu por tuma lugá na e manera tradishonal, pero adaptá. A kuminsá suavisá medidanan di Covid-19, sinembargo tin sierto medidanan ku a keda na vigor. Pues ta responsabilidat na nos kada unu pa tene kuenta ku reglanan vigente.
