KRALENDIJK, Bonaire
A pone e maneho pa drenta Boneiru den un Ordenansa di Emergensia, ku inmediatamente ta drenta na vigor. Motibu pa e ordenansa di emergensia ta ku Aruba a habri su frontera pa paisnan di riesgo haltu. Di e manera akí ta posibel ku biaheronan prosedente di un pais di riesgo haltu despues di un estadia na Aruba, dentro di 14 dia, ta sigui biaha pa Boneiru. A krea e ordenansa di emergensia pa por mantené e maneho pa drenta Boneiru.
Deklarashon di salú
Tur persona ku ta biaha pa Boneiru ta obligá pa yena un deklarashon di salú kompleto i yená konforme bèrdat i na yegada na Boneiru entregá esaki na e outoridat kompetente.
Restrikshon di entrada for di paisnan di riesgo haltu
Personanan ku via espasio aéreo òf awa teritorial ta drenta Boneiru i ku ménos ku 14 dia promé ku yegada na Boneiru tabata na un pais di riesgo haltu, manera indiká den artíkulo 2 di e Areglo, no tin mag di biaha pa Boneiru.
Nenga entrada
Si tòg nan presentá na aeropuerto, ta nenga nan e ora ei entrada na Boneiru. Despues di esei ta responsabilidat di e kompania di aviashon i e biahero pa mesora regresá e aeropuerto di salida. Gastunan ku ta enbolbí den esaki ta pa kuenta di e kompania di aviashon i/òf e biahero mes.
Karentena
Si tin sirkunstansia ku ta pone ku un pesona for di un pais di riesgo haltu tòg ta drenta Boneiru, e ora ei e persona akí ta obligá pa, riba propio gastu, mesora despues di su yegada na Boneiru, bai 14 dia den karentena na un lugá indiká pa Gezaghèber di Entidat Públiko Boneiru. Nan mester tene nan mes na e medidanan i proseduranan ku ta duna ora hasi esaki pa prevení un brote òf ku e vírus di Corona ta plama. Si personanan no tene nan mes na esaki, ta persiguí nan penalmente.
Durashon Ordenansa di Emergensia 14-7-2020
E medidanan menshoná anteriormente ta nesesario pa prevení òf limitá mas tantu posibel reintrodukshon di COVID-19 na Boneiru i ku esaki ta plama riba e isla aki.
E reglanan den e Ordenansa di Emergensia 14-7-2020 ta drenta na vigor inmediatamente. E ordenansa ta vense promé di ougùstùs 2020, a ménos ku promé ku e fecha ei disidí na prolongashon òf revokashon di e ordenansa.
Kambio paisnan di riesgo abou
A kita Luksemburgo for di e lista di paisnan di riesgo abou i a agregá Suisa na e lista akí.
Mas informashon
Pa informashon aktual, wak riba e página di Facebook di Entidat Públiko Boneiru.