Tourism Corporation Bonaire (TCB) ku orguyo ta
presentá e ‘sign’ nobo di Boneiru den Isidel Beach Park, den kolaborashon ku Bonaire
Overheidsgebouwen (BOG). E inisiativa akí ta parti di Boneiru su esfuersonan mas
amplio pa engrandesé popularidat di nos isla i mehorá eksperensia di nos
bishitantenan.
E ‘sign’ nobo ta un parti importante di e proyektonan di ‘branding’ di Boneiru ku ta
andando, ku enfoke riba oumentá e forsa di aktrakshon visual di nos isla i ofresé
sitionan ikóniko na bishitantenan pa kapta nan rekuerdonan. E ‘sign’ di Boneiru ta
posishoná stratégikamente na Isidel Beach Park i e ta ofresé un sitio ideal pa
bishitantenan saka potrèt, loke ta promové e marka Boneiru riba plataformanan di
medionan sosial i ta sòru pa realisá un popularidat mas grandi rònt mundu.
“E proyekto akí ta mas ku solamente un añadishon estétiko na nos isla”, segun Miles
Mercera, direktor di TCB. “E ta un zèt kalkulá pa invitá nos bishitantenan pa eksplorá nos
isla i pa enkurashá nan pa eksperensiá bunitesa di Isidel Beach Park ku su ‘sign’ nobo di
Boneiru komo punto di orientashon. For di tempu ku nos a lansa nos ‘branding’ nobo di
destinashon na aña 2022, nos a traha estrechamente huntu ku BOG pa realisá e
proyekto akí.”
E ‘sign’ nobo ta un añadishon hopi bon biní, spesialmente pa nos bishitantenan krusero,
shofùrnan di taksi i doñonan di negoshi ku hopi biaha a pidi pa un ‘sign’ di Boneiru pa
kapta eksperensia di nos bishitantenan na nos isla. E inisiativa akí ta kuadra bon tambe
ku nos esfuersonan pa manehá e kantidat di turista na nos isla, pa medio di ofresé un
sitio designá pa saka potrèt, loke lo yuda pa repartí presensia di nos bishitantenan den
un forma mas balansá atraves di e áreanan popular.
E kolaborashon entre TCB i BOG ta un ehèmpel di dedikashon di nos isla na inisiativanan
pa desaroyo di produkto sostenibel. Boneiru su aspirashon ta pa diversifiká eksperensia
di bishitante i na mes momentu konservá enkanto i karakter di su áreanan popular.
