ORANJESTAD, Aruba
Parlamentario Endy Croes no por haña su mes den e pensamento discriminatrio di Minister Presidente Mark Rutte y Staatssecretaris Raymond Knops e spreekbuis di Hulanda mei mei di e crisis aki. Diadomingo ultimo riba un dia cu parcialmente un politico ta purba dedica algun ora na famia nan a kita cantidad di ora di nos Minister Presidente Evelyn Wever Croes pa debati cune riba un condicion nobo cu Hulanda kier agrega na un manera sorpresivo promer cu duna Aruba e siguiente prestamo. Despues cu Aruba a cumpli cu tur otro condicionnan esta entre otro corta 12.5% riba salaris di ambtenaar y empeladonan di Overheids NV , corta 25% riba entrada di Parlamentarionan y Minister, corta 10 miyon den Goederen en Diensten, 50% riba Bonus di pensionadonan di APFA, 10 miyon den Social Crisis Plan pa nombra algun. Despues Hulanda a exigi Aruba pa corta 35 miyon den AZV esta 5 miyon pa Luna cuminsando den Juni 2020. Den crisis momento mas mester brinda pueblo e ajudo di salud Aruba a cumpli cu esaki tambe. Pues ta kiko mas Raymond Knops kier anto?
/// Hulanda kier bebe sanger di e pueblo aki:
Hulanda diadomingo ultimo kier pusha Aruba pa tuma un desicion hopi impopular. Despues cu Betico Croes a sacrifica su bida liderando e lucha pa logra un Status Aparte unico cual e mes a categorisa como un clompi di diamanta, awe Knops kier exigi contra tur ley pa Aruba entrega esaki y acepta Consensus Rijkswet ( hunto cu Corsow y St Maarten) sino no lo ricibi plaka. Cuchui na carganta! Hulanda ta pushando e pueblo aki mei mei den un crisis den un rumbo pa nos mendiga y biba na rudia. Wel Parlamentario Endy Croes ta bisa hamas por conta cu su persona pa algo asina. No ta e momento pa discuti Statuut di Aruba y no ta momento pa bende Aruba pa 200 miyon cu Hulanda. Laga e mensahe aki ta uno kla pa Raymond Knops y Den Haag.
/// Por constata cu Raymond Knops no ta homber di palabra:
Parlamentario Endy Croes ta splika cu Raymond Knops dia 14 di Mei 2020 a contesta alrespecto Liquiditeitssteun Aruba, Curacao, St Maarten lo siguiente na pregunta number 4 di VVD Fractie, cual tin un verslag por escrito kenmerk 35443. “ Het betreft structurele hervormingen op het gebied van de economie, de arbeidsmarkt, de kapitaalmarkt,het pensioenstelsel,het sociale zekerheidstelsel, het zorgstelsel, de overheidorganisatie en het bestuur.” Pues ningun pero ningun momento Knops a papia di staatkundige hervorming. Pa diadomingo Knops y Hulanda kier “horta” Status Aparte di Aruba mei mei den un crisis y kier duna Aruba 5 dia pa tuma un decision ta wordo considera un acto criminal y di cobardia di marca mayor. Take it or leave it sino Aruba no lo haña plaka. Esaki ta discriminatie ten top! Parlamentario Endy Croes semper ta kere den dialogo y den un dialogo tin 2 partido anto ta hunto lo buska un salida. No ta e momento awor cu nos pueblo ta den hamber, 37000 hende sin trabou, turismo riba un lockdown anto awor Bo kier probecha manera un ladron den anochi cu un exigencia asina fuerte. Ora mi jama macamba cobarde nan kier rabia cumi. Tin alternativa y mester poko tempo pa esey. Mi ta spera Knops y Hulanda recapasita cu no ta e momento pa strangula un pueblo. Na 1953 un total di 1836 Hulandes a perde nan bida y mas di 100 mil a perde nan cas. Aruba, Corsow y demas islanan mesora a saka man y a juda Hulanda anto sin ningun condision. Esey ta prueba di nos curason ta!