Tin un kantidat di hende ku no por kumpra bòter
di gas grandi na Curoil. E motibu ta ku e persona òf e adrès mester ta registrá na
Curoil. Si e persona òf e adrès no ta registrá na Curoil, e persona no por kumpra
bòter di gas yen na e kompania akí. Curoil ta eksigí pa registrá i paga depósito di
nobo pa por bestèl bòter yen serka nan. Debí na e posishon di monopolio di
Curoil e persona no tin otro opshon tampoko. Awor t’asina ku e hendenan aki tin
nan bòternan ku nan a yega di paga depósito pa nan kaba, pero nan no ta registrá den
e sistema nobo di Curoil. Konsekuentemente nan no por bestèl bòter nobo i yen serka
Curoil. Tin un kaso kaminda un persona tin 4 bòter di gas. Na momentu ku el a muda
bai biba na otro adrès, el a bai ku 2 bòter di gas pa kua den pasado el a yega di paga
depósito na Curoil. Na e kas kaminda el a bai biba tin 2 bòter kaba, i asina e ta disponé
di 4 bòter awor: 2 di su persona i 2 di e doño di kas kaminda e ta biba. Ta resultá awor
ku e no por kumpra gas ni riba su nòmber ni riba e adrès kaminda e ta biba, pero sí e
tin e 4 bòternan bashí.
Sistema nobo
E problema aki a surgi na momento ku Curoil a introdusí un sistema nobo, pero no a
registrá tur hende ku tabatin un òf mas bòter di gas kaba. Konsekuentemente e persona
òf e adrès no ta aparesé den sistema nobo di Curoil, di manera ku e no por kumpra
bòter yen serka Curoil. Pa solushoná e problema akí Curoil ta eksigí pa registrá i paga
depósito di nobo pa por bini na remarke pa bestèl bòter yen. E pregunta ta awor ku si e
persona ku tin 4 bòter kaba na su adrès, ta bai haña di 5 òf di 6 bòter na su kas. Esaki
pasobra lógikamente mirá, si e tin ku paga depósito di nobo, e tin ku haña bòter nobo
tambe.
No ta debolbé depósito
Tin kaso tambe kaminda un persona tin 4 bòter di gas, pero Curoil ke tuma nan bèk sin
debolbé e depósito. Nos ponensia ta: semper Curoil tabatin monopolio, pues semper
Curoil tabata e úniko suministradó di bòter di gas i semper mester a paga depósito pa
por haña bòter di gas. Ku otro palabra e bòternan mester ta di Curoil i mester a paga pa
nan, kon por ta ku awor Curoil ke tuma nan bèk sin debolbé e persona su depósito?
Curoil mester bin ku solushon
Den pasado a yega di topa mas hende ku e problema ku Curoil no ke entregá bòter di
gas pasobra e personanan no ta registrá den e sistema di Curoil. Nos no ta na haltura
ku den nan kaso nan a paga Curoil e depósito pa nan registrá di nobo i asina nan por a
kumpra bòter di gas i di e manera ei a solushoná e problema. Nos no ta sigur ku tin
hende ta usa otro opshon pa solushoná e kestion akí, p.e. kumpra via otro personanan
ku sí ta registrá. Echo ta, ku Curoil a okashoná e problema akí ora nan a introdusí nan
sistema nobo i a bira tempu pa nan solushoná e diskrepansia aki.
