Diadomingo 22 di januari 2023 den careda di 3’or y mey di marduga, den Sint Maartenstraat a bin topa cu un homber drumi riba vloer, den un plas di sanger. Mesora a pidi pa presencia di polis y ambulance cu urgencia.
Hopi lihe un patruya di polis a yega na e sitio y a cera e area pa asina por a cuminsa cu e investigacion necesario. Algun persona cu tabata na e sitio a avisa polis cu nan a topa cu varios pertenencia di e persona benta un poco mas leu di unda e victima a wordo haya.
Na yegada di ambulance, e paramediconan a atende cu e victima, nan a transport’e pa Imsan y un rato despues cu urgencia e la wordo transporta pa Hospitaal. Segun nos a compronde e homber aki ta victima di un caso serio di maltrato.
Autoridad a tene e area di e sucedido pa basta rato cera, te ora cu nan a caba cu e investigacionnan necesario. E caso di maltrato serio aki ta den man di autoridad.
