Djabièrnè último 4 aparato di tèst a yega Boneiru for di Hulanda. Ya for di djasabra 20 di mart a pone esakinan den uso. E 4 aparatonan huntu tin un kapasidat di 288 tèst pa kada 24 ora. A hasi pedido pa un di 5 aparato. Ta trata di un vershon mas grandi ku ta adekuá pa prosesamentu di maksimal 380 tèst pa dia aserka.
Un bon koperashon entre BonLab NV i e kompania hulandes Hestia CSC a hasi ampliashon di e kapasidat di tèst lokalmente posibel. Ocho siman pasá Entidat Públiko Boneiru a tuma kontakto ku Hestia CSV, pasobra e kompania aki ta distinguí su mes di otro proveedornan pa loke ta trata profeshonalidat i rapides. Despues di esei Entidat Públiko Boneiru a pone e kompania den kontakto ku e kompania di gobièrnu BonLab NV. Seguidamente BonLab NV a konkretisá e palabrashonnan di koperashon, loke a resultá den un entrega di urgensia di e aparatonan ku djabièrnè a yega Boneiru.
Huntu ku e aparatonan a bini tambe un tékniko di laboratorio for di Hulanda ku tin eksperensia amplio ku e aparatonan nobo. El a entrená empleadonan di BonLab den kon pa traha korektamente ku e aparatonan. Ta trata di e asina yamá tèst di NAAT, un vershon rápido di e konosido tèst di PCR ku un resultado dentro di mei ora. No ta nesesario mas pa manda tèst pa análisis na Kòrsou. Ku e aparatonan aki lo entregá e resultadonan mas rápidamente na departamento di Salubridat Públiko i na turistanan. Direktor Xander Schurink di Hestia: ‘Hestia ta un kompania ku un embolbimentu sosial fuerte. A base di nos bèkgrount di kuido nos ta komprendé sumamente bon kiko e impakto di e malesa i un pandemia manera esaki ta. Pa e motibu aki no ta nada mas ku lógiko pa koperá ku un petishon manera nos a haña di Entidat Públiko Boneiru. Esei nos ta hasi ku amor. Komo direktor mi ta orguyoso ku e koperashon i e manera ku durante e último dianan tur hende a hasi posibel pa logra haña tur kos reglá asina rápidamente.’
Ta bai hasi uso di e kapasidat èkstra di tèst pa tantu habitantenan lokal komo pa bishitantenan di nos isla, pa kende na momentu di regresá nan pais di orígen un obligashon di tèst ta na vigor, manera na Hulanda entrante 20 di mart. Gezaghèber Rijna: ‘Hasi hopi tèst ku un resultado rápido ta e manera mas efektivo pa logra haña e brote aktual bou di nos poblashon bou di kontròl.’ Direktor interino di BonLab Hose Booi: ‘Ku Hestia CSC nos tin un partner profeshonal ku ta komprendé bon kiko nos mester na Boneiru.’
Diputado Hennyson Thielman: ‘Banda di e interes di salubridat públiko e paso aki ta importante tambe pa turismo. Ampliashon di e kapasidat di tèst ta bon pa ámbos interes, tanten ku nos no a alkansá e grado optimal di bakunashon ainda.’ For di djadumingu biaheronan por laga tèst nan mes. A lansa un wèpsait kaminda por plania un sita: www.bonairesafetravel.org
1 comment