Aruba Tourism Authority (A.T.A.) ta orguyoso di anuncia cu Aruba a wordo reconoci pa premiacion di
Tripadvisor’s® Travelers’ Choice® 2024. E premio prestigioso aki ta honra destinacionan cu ta ricibi
evaluacionan excepcional, consecuentemente Aruba ta bira e mihor destinacion den Caribe y e di binti
cuater mihor destinacion di registro mundial riba Tripadvisor.
Como e plataforma di mas grandi di guia di biahe mundial, Tripadvisor ta basa su premionan riba feedback
autentico di huespednan cu a laga evaluacion directo y honesto durante un aña completo. Esaki ta
converti e reconocemento di Travelers’ Choice den un seyo di excelencia confia pa destinacionan
extraordinario.
“Esaki ta un celebracion di e brasa caluroso di Aruba dirigi na cada huesped, un tributo na e dedicacion di
nos socionan di e industria di turismo, y un afirmacion atractivo y unico di e isla,” segun Ronella Croes,
CEO di A.T.A. “Nos ta sinti honra pa wordo reconoci entre companianan prestigioso, tanto regionalmente
como mundialmente, y esaki ta stimula nos pa sigui ofrece experiencianan excepcional pa nos
huespednan.” Ronella Croes ta termina.
John Boris, Chief Growth Officer di Tripadvisor, ta felicita e isla di Aruba:
“Pabien na e isla di Aruba pa cu reconocemento den Premio Travelers’ Choice di Tripadvisor 2024.
Travelers’ Choice ta honra destinacionnan cu ta demostra un compromiso continuo den provee servicio
excepcional den hospitalidad. E premio aki ta un símbolo di e impacto memorabel cu Aruba tin riba su
huespednan, cu a resulta cu hopi ta esnan cu a tuma e tempo pa laga un evaluacion positivo di nan
experiencia na Aruba riba plataforma di Tripadvisor. Ta importante pa menciona cu huespednan ta uza e
seyo di Travelers’ Choice como un guia pa descubri e mihor lugarnan pa bishita, come, y relaha. Nos ta
spera cu e reconocemento aki continua na atrae hopi mas oportunidadnan pa Aruba den 2025, y pa e
añanan binidero.”
Un gradicimento na nos huespednan y na tur cu ta brinda servicio directo y/of indirecto na e industria di
turismo. Boso contribucion ta keda uno valioso pa nos isla.
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion
independiente den e esfera publico. Aruba Tourism Authority ta fungi como ‘Destination Marketing and
Management Organization (DMMO)’ y ta responsabel pa uni interes turistico entre socionan local e
internacional. A.T.A. ta pone hopi enfasis riba e e modelo di “High Value-Low Impact” cu ta para pa un
balans entre aumenta e balor economico di e bishitante, posiciona Aruba como un pais desea y
sostenibel, y posiciona Aruba como lider di desaroyo como un destinacion. Cu meta pa sigui mantene
esfuerzonan den linea segun e balans menciona, y logra aumenta entrada pa medio di calidad di turismo
en bes di e volumen cu nos destinacion ta ricibi. Capacidad di carga ta sigui ricibi atencion di parti di
A.T.A.