Tur locual hende papia nan ta sembra, den bo mes boca , tin palabra cu ta edifica pero den bo boca tin
palabra cu ta kibra bo mes, pesey hende mester wak bon kico nan ta papia.
Si bo ta papia malo di bo hende nan di cas , mayan cu Dios kier lo bo cosecha locual cu bo ta papia.
Si bo ta papia malo di bo esposo/esposa mayan cu Dios kier lo bo cosecha locual cu bo ta papia.
Si bo ta traha tur dia y bo ta bisa cu bo salario no ta yega pa nada, lo bo ta bashi tur momento.
Si bo ta confia Dios pa bo sanacion, y tur dia bo ta lanta ta murmura cu bo no ta bira bon bo ta keda
malo. Pasobra bo no ta demostra fe den Dios ni tampoco gratitud na Dios.
Si bo mes ta yama bo yui, “ladron y sinberguensa y expresa cu bo no sa ken a pari e mucha,” no spanta
pa locual bo ta bay cosecha.
Si constantemente bo ta papia di divorcio, enbes di coregi bo bida matrimonial y wak di bo banda con
bo por mehora bo relacion y pidi Dios yuda bo, divorcio lo bati na bo porta.
Si bo ta pidi malo pa hende, of haci malo cu hende, si bo ta sembra pleito y rabia den hende , lo yega e
momento cu tur cos lo bolter y tur hende lo sa ken bo ta.
No laga hende usa bo pa maldad, no sostene mentira pa ningun hende, pasobra mayan nan mes ta laga
bo cay, pasobra maldad no por sostene bondad.
Si bo kier un situacion drecha, expresa bondad cu bo boca, pasobra papia bon ta manera oracion y lo
bo cosecha su fruta.
Morto y bida ta den e poder di lenga, y esnan cu stima esaki lo come su fruta. (Proverbionan 18:21).
Ora nos ta papia nos mester pidi Dios control di nos lenga, pasobra cu e mesun boca cu nos ta
bendiciona, nos ta maldiciona hende, cu mesun boca cu nos ta sera amistad , nos ta traiciona, y cu
mesun boca cu nos ta bisa nos ta stima hende ta sali palabranan grave di ofensa.
Ta berdad cu tur locual hende sembra nan lo cosecha, pasobra ningun hende no por haci bofon di Dios,
ta dificil pa bo baila cu Dios y diabel den mesun fiesta.
Bo por ganja y manipula hende tur dia, pero ora bo pensa cu bo por ganja Dios ta bo mes bo ta ganja.
Papia constantemente bon di bo famia, papia bendicion den bo hogar, stop cu pleito, bringamento y
vengansa, pasobra esey ta senjal cu e enemigo ta presente, pasobra ta esey ta locual diabel ta sembra,
no lubida cu diabel a bini solamente, pa horta, pa mata y destrui, nos mester reconoce esey, y asina
tuma autoridad den Cristo Hesus y reprende tur plan di maldad,.
Nos mester decreta bon bondad , y asina bondad lo bini pa nos (Job 22:28).
Si abo mes no hacie, ningun hende lo hacie pa bo, pasobra tur cos a cuminsa cu palabra, y tur dia nos
ta mira poder di e Palabra di Dios, pasobra for di un principio Dios a traha tur cos pa medio di su
palabra.
E palabranan cu bo ta expresa cu bo boca, ta identifica bo, pasobra eynan hende lo mira si bo ta hende
cu por wordo confia si of no.
Papia bon y haci bon cu tur hende, declara cosnan bunita pasobra bida, ta un cosecha di palabra.
Sinceramente, Pastor Marcel Balootje.