Di e 17 landadonan di Giants Aquatics Aruba, cu a bay competi na e 34th Annual Winter Championship na Plantation, 10 landado a logra landa den 34 finals! Di e landadonan aki, tres ta medayista, esta: Neymar Rasmijn, Inald Fernandes Perna y Avi Tromp. En total a bin cu 6 medaya Aruba, di cual 1 oro, 2 plata y 3 brons. Mayoria di e landadonan a haci nan personal best times, cu apoyo total y masal di e mayornan presente y bou guia di coach Rayon, coach Vera y headcoach Jordy.
Esaki ta e di cuater biaha cu Giants Aquatics Aruba, cu lo cumpli 5 aña na januari proximo, ta participa na e magno evento aki, cu ta conta cu mas cu 1000 participante cada aña. Cada aña e resultadonan ta mehora pa e landadonan di Giants Aquatics y mas y mas landado ta cualifica. Esaki ta un testimonio di e vision y mision di Giants Aquatics, cu ta encera, entre otro, desaroya e atleta pa e competi na nivel internacional. E enfoke principal ta riba e desaroyo personal di cada landado individual y su miho tempo den pool y no riba e cantidad di medaya individual of pa e team.
Directiva di Giants Aquatics Aruba ta orguyoso di e participacion y logro di cada landado na Plantation y ta gradici e mayornan pa nan contribucion, nan cooperacion, nan entusiasmo y pa kere den e vision di Giants Aquatics Aruba.
