James Finies, lider di Pueblo Progresivo Uni, i Davika Bissessar-Shaw, presidente di Bonaire Human Rights Organization (BHRO) resientemente a konklui dos siman eksitoso na Merka. Nan esfuerso tabata inklui lobby na Nashonan Uni I partisipashon den seminarionan pa avansa derecho humano, dekolonisashon I hustisia pa Boneiru I otro teritorionan kolonisa.
Un punto di enfoke prinsipal di nan trabou tabata lucha pa Boneiru su inklushon riba lista di Teritorionan-Sin-Propio-Gobernashon di Nashonan Uni. E rekonosementu aki ta esensial pa duna Boneiru su derecho di outo-determinashon. Finies a enfoka riba e alarmante redukshon den porshentahé di habitante nativo Boneiriano, ku a baha for di 80% pa alarmante ta bao di 30% awe na 2024 después di e disolushon di Antia Hulandes na 2010. Finies a referí na e dia 10 di oktober 2010 komo “un pesadia” i a pone un parti di e kulpa na polítikonan lokal ku a faya na defende e derechonan i identidad di pueblo Boneriano. BHRO a enfatisá ku pone Boneiru riba e lista di Teritorionan Sin Propio Gobernashon ta krusial pa proteha su kultura i identidad úniko.
E delegashon a partisipá tambe den e 35 Seshon di Grupo di Trabao di Ekspertonan di Hendenan di Desendensia Afrikano (WGEPAD), kaminda nan a kontribuí den diskushonan riba desigualdad I inhustisia sistemátiko ku ta affektá e desendientenan Afrikano mundialmente. BHRO a co-host tambe un side-event titulá, “Hustisia Reparativo i Deskolonisashon: Avansando Derecho Humano pa Desendiente Afrikano den Teritorionan Kolonisa”, ku a reuni aktivistanan i lidernan I outoridatnan mundial pa atende ku efektonan ku kolonialsimo a laga atras.
Den komemorashon di Dia Internashonal di Derecho Humano riba 10 di Desèmber, BHRO a subrayá e importansia di promove dignidat, libertat, igualdat i hustisia pa komunidatnan marginalisá, spesialmente den teritorionan vulnerabel manera Boneiru.
E mesun dia, BHRO, representá pa James Finies, a formalisá un aliansa ku United for Human Rights, representá pa Emma Sims, atrabes di un Memorandun of Understanding (MOU). E afiliashon akí ta enfoká riba desaroyá programanan di edukashon i formashon pa promove derecho humano riba Boneiru, Kòrsou, i Aruba (Islanan ABC). Esaki ta un paso signifikante pa yuda komunidatnan lokal den region na konsientisá i protehá nan derechonan humano fundamental.
Sra. Bissessar-Shaw tambe a hala atenshon riba e diskulpa di Hulanda pa su rol den sklabitut i e asina yama kompensashon di 200 miyon. E la kritika e distribushon di fondo, indikando ku 100 miyon a bai bek o ta keda Hulanda pa un museo na Hulanda, mientras ku solamente 33 milyon a bai pa Surinam i ex isanan di Antia Hulandes, ku ta laga kada isla Antiano ku solamente 5 miyon. E la kalifiká esaki komo un rektifikashon inadekua pa e siglonan di ekplotashon I inhustisia.
BHRO ta urgi I atverti e habitantenan lokal I residentenan ku tin hopi anja biba na Boneiru pa trata di rekonose ku subimentu di nivel di laman I koral bleaching ku ta wordu eksagera no ta menasanan direkto. E krisis real I menasa direkto pa e Boneriano ta e bahada, redukshon di e poblashon lokal di 80% na menos ku 30%, ku e gobierno Hulandes ta ignorando a pesar di e referendum di 2015 ku a rechaza e integrashon illegal. Narativonan, manera GreenPeace Hulanda, Enviado Spesial di Nashona Uni ex-gezaghebber Edison Rijna I awor e Mesa di Klima tur esakinan ta husa lokalnan pa propaganda falsu pa desvia atenshon for di e problema aki.
Ku nan lucha di konsientisashon, BHRO a pone Boneiru den un spotlight global i a yama pa sosten global pa garantisa e derechonan humano i autodeterminashon di Boneiru. BHRO a reafirmá su kompromiso pa lucha pa hustisia, igualdat, i sobrevivensia di e pueblo di Boneiru ku ta konfrontando marginalisashon sistemátiko i impaktonan di kolonisashon.
