PoliticaLocal

Gabinete Wever-Croes II ta bolbe marca historia den maneho di finanzas

Ricky Hoek

Parlamento di Aruba a trata e
Presupuesto Supletorio (Nota di Fin di Aña of Najaarsnota) 2024. E presupuesto supletorio ta
un presupuesto cu ta trata e ahustacionnan cu a keda haci durante aña den e presupuesto
nacional di pais Aruba.
Parlamentario di Fraccion di MEP, Ricky Hoek ta indica cu e presupuesto nacional di
aña 2024 a keda trata y aproba pa Parlamento di Aruba na december di 2023. Esaki ta debi cu
e presupuesto a keda entrega na tempo manera ley ta prescribi y cu di e manera ey
Parlamento tambe tabata tin e tempo necesario pa por a studia y trata e ley di presupuesto
2024.
Na momento cu un presupuesto keda aproba na tempo, esaki ta duna gobierno e
aprobacion pa (sigui) ehecuta nan maneho y proyectonan cu ta planea pa e aña venidero, el a
bisa.
Maneho historico
Hoek a agrega cu e biaha aki Gabinete Wever-Croes II ta bolbe marca historia den e
maneho financiero di pais Aruba. E presupuesto di 2024 a wordo entrega y aproba na tempo.
Na mei, Gobierno a entrega e “Voorjaarsnota” y e cambionan di e presupuesto, y e siman aki
Parlamento a trata e “Najaarsnota” y e cambionan di e presupuesto.
Historico tambe ta cu e presupuesto ta contene un surplus di 2.6%. Esaki ta 1.6% mas
halto di loke e mester ta inicialmente. Y mas historico ta cu danki na e cambionan aki, nos ta
cera aña cu e debe nacional di pais Aruba na 71%. Esey kiermeen, cu di cada florin cu tin den
caha di gobierno, 71 cen ta bay pa paga e debe nacional y 29 cen ta pa haci inversionnan den
nos país, e parlamentario a remarca.
Si sigui cu e bon maneho financiero aki, ta premira cu pa rond di 2035 nos por yega
na e meta di baha e debe nacional na 50% y subi e suma di inversion pa pais. Pues, na
momento cu tur dos presupuesto supletorio a keda trata den Parlamento di Aruba, por bisa cu
e ciclo di e aprobacion y control financiero a cera exitosamente, Ricky Hoek a declara.
Tarea necesario pa e gabinete y parlamento nobo
Pa e gabinete y parlamento nobo cu mester bay sinta entrante 2025, tin un tarea
financiero hopi importante ta warda nan. E disciplina di e hiba un bon maneho financiero pa
pais Aruba mester continua, pa asina garantisa cu Aruba ta cumpli cu su leynan financiero,
pero tambe cu su responsabilidadnan di pago di e debe nacional, el a expresa.
Banda di esey, e maneho aki ta yuda na yega na un surplus di cual e placa adicional ta
wordo inverti den pueblo. Di otro banda, si no sigui cu e maneho structural di tin un finanzas
na ordo, por spera cu Aruba lo por bay bek den e temporada caminda hopi debe a wordo crea
y sin un reserva financiero den caha di gobierno.
“Por ultimo, mi ta lamenta cu e Presupuesto 2025 no a keda trata den Parlamento
prome cu fin di aña manera a sosode e ultimo dos añanan. Awor ta na e gabinete nobo pa wak
si e ta mantene e presupuesto como tal of e ta haci ahustacion den dje. Pa e Parlamento nobo
cu lo sinta dia 8 di januari proximo, mi ta spera cu Parlamento pone e presupuesto como su

prioridad y trata esaki lo mas pronto posibel na bienestar di nos tur na Aruba”, asina
Parlamentario Hoek a finalisa.

Related posts

Señora mr. J.S. de Vries a keda nombra como fiscal mayor nobo pa Aruba

EA News Author

Reforsa programa preparatorio di studiante cu ta bay studia

EA News Author

Wardacosta y Cuerpo Policial Aruba ta intercepta yola cu jerrycans

EA News Author

Leave a Comment

Whatsapp Message