WEB Aruba ta consciente cu su servicio relaciona cu introduccion di e sistema nobo di cliente no ta optimal ainda y cu esaki a trece cun’e cu clientenan lo no por paga nan cuenta di awa na tempo. Debi na e esaki gerencia di WEB ta informa cu lo no desconecta suministro di awa durante lunanan di december y januari proximo. Asina gerencia di WEB a informa den un comunicado. Ta trata di e cuentanan di awa cual ta caduca na lunanan di december y januari. Ademas lo no cobra boet pa clientenan cu ta paga despues di e ultimo fecha di pago.
E sistema nobota den fase di stabilisacion.Tin algun cliente cu actualmente ta haya nan cuenta di awa mas laat cu normal. Ademas clientenan cu tinstanding order via banco ta experencia tardansa den pago di nan cuenta di awa. Tur esaki a pone cu gerencia di WEB a dicidi cu lo no cobra boet ni desconecta conexion di awa di clientenan cu no a paga na tempo.
Entretanto ta haciendo lo maximo pa optimalisa y stabilisa funcionamento di e sistema nobo mas liher cu ta posibel. E teamnan ta trahando diligentemente pa atende cu cualke retraso den servicio y pa yega na un funcionamento optimal y stabil di e sistema. Ademas ta duna asistencia na clientenan durante oranan di atardi pa anochi na e diferente MFAnan. Awe, 12 di december 2024 e team di WEB lo ta na MFA Savaneta entre 5.30 pm y 8.30 pm.Ta pidi comunidad pa keda pendiente pasobra lo bay tin mas oportunidad, caminda WEB lo ta presente den oranan di atardi/ anochi pa ofrece asistencia na clientenan.Un biaha mas ta gradici comunidad henter pa e comprension y pasenshi durante e periodo aki. Tambe WEB Aruba ta gradici ELMAR y MFA pa e asistencia ofreci durante e periodo di transicion aki.