Konseho Sosial Ekonómiko (SER) a risibí ayera kopia di e buki E
Konsehero Konfidensial Proaktivo, skibí pa Karin Bosman. E obra ta presentá pensamentunan inovativo
tokante seguridat laboral i e ròl di konseheronan konfidensial den organisashonnan. E akto di entrega a tuma
lugá na ofisina di SER i a konta ku presensia di Raul Henriquez, direktor i sekretario general di SER, i Sharlyn
Curial-Villareal, konsehero legal mayó.
Karin Bosman, un eksperto internashonal riba tereno di seguridat laboral i karga laboral psikososial, ta
fundador di Report App, un plataforma ku ta yudá organisashonnan desaroyá un ambiente di trabou sigur. Den
su buki, Bosman ta pone énfasis riba e nesesidat di un aserkamentu proaktivo i preventivo pa manehá konflikto
i komportashon no apropiá na boka di trabou.
SER ta suprayá e posibel importansia di e buki aki pa Kòrsou. “Seguridat laboral ta un pilá fundamental pa un
kresementu ekonómiko sostenibel i relashonnan laboral inklusivo”, segun Henriquez.
Bosman ta kolaborá ku organisashonnan lokal pa vários aña, ofresiendo training i konseho den maneho
tokante siguridat laboral. Su buki ta funshoná komo un guia pa organisashonnan desaroyá un kultura di trabou
sano i ta aliená ku e esfuersonan di SER pa promové koheshon sosial i un trabou sostenibel riba e isla.
Ku e publikashon aki, SER ta yama empresarionan, empleadonan i mandatarionan pa pone seguridat laboral
komo prioridat. Segun SER, e tema no ta solamente importante i relevante pa mehorá relashonnan laboral,
sino tambe pa kontribuí na un desaroyo sosioekonómiko mas fuerte pa Kòrsou.