Tourism Corporation Bonaire (TCB) a kompartí
datonan turístiko preliminar pa luna di novèmber 2024, for di kua ta resultá ku Boneiru a
risibí 16.626 bishitante stayover. Esaki ta un oumento di 19,5% kompará ku luna di
novèmber 2023, ora ku 13.910 turista a bishitá nos isla.
E bishitantenan for di Hulanda a forma e grupo di mas grandi, loke ta representá 46,4%
di e kantidat total di yegada ku 7708 bishitante, un oumento di 9,1% kompará ku
novèmber 2023, ora ku 7062 bishitante a yega nos isla. E bishitantenan merikano tabata
e di dos grupo mas grandi, representando 26,2% di e yegadanan ku 4361 bishitante. Esaki
ta un oumento konsiderabel di 60% kompará ku e 2726 bishitantenan di novèmber 2023.
E bishitantenan for di Kòrsou a representá 12,2% di e total, ku 2034 bishitante, miéntras
tabatin kontribushonnan adishonal for di Alemania (2,4% – 402 bishitante), Canada (2,4%
– 391 bishitante) i for di Bélgika, Aruba, Colombia, Brasil i Suisa.
Por atribuí e oumento remarkabel di bishitantenan merikano na e konekshonnan aéreo
nobo, manera e rutanan di JetBlue ku a keda ampliá i e buelonan èkstra di otro
kompanianan aéreo, ku ta mehorá aksesibilidat pa merkadonan importante.
E bishitantenan merikano a bini prinsipalmente for di estadonan manera New York,
Florida, Texas, New Jersey, Colorado, California, Georgia, Pennsylvania, North Carolina i
Massachusetts.
E repartishon a base di edat ta mustra ku e biaheronan di edat un tiki mas haltu di 55 pa
64 aña a representá 22,7% di e bishitantenan i esunnan di 65 aña bai ariba a representá
20,7%. Di e bishitantenan hulandes, mayoria a bini for di Noord-Holland, Zuid-Holland i
Noord-Brabant, ku e gruponan di edat di 55 pa 64 aña (26,7%) i di 45 pa 54 aña (18,5%)
komo e segmentonan di mas grandi.
Boneiru a yama bon biní na 16.626 bishitante stayover den luna di novèmber 2024
