Siman pasá Dutch Caribbean Nature Alliance (DCNA) a risibí un
kontribushon finansiero adishonal for di Nationale Postcode Loterij. Nan ta haña e kontribushon akí
riba e kontribushon di mas aña di 500.000 euro pa aña. E kontribushon adishonal ta di gran
importansia pa e trabou di DCNA i nan ta bai us’é pa protekshon i rekuperashon di áreanan di
naturalesa den e parti karibense di Reino Hulandes. Na Boneiru, Jonne Arnoldussen, direktor general
di Postcode Loterij, a entregá un chèk na direktor di DCNA Arno Verhoeven. Esaki a tuma lugá durante
e último reunion di direktiva di DCNA di e aña akí, kaminda e organisashonnan afiliá di konservashon
di naturalesa di e seis islanan tabata presente.
E áreanan di naturalesa den e parti karibense di Reino Hulandes, manera e refnan di koral den oséano i e
mondinan di palu di mangel na kosta, durante e dékadanan tras di lomba kada biaha a deteriorá mas
rápidamente pa loke ta trata kalidat i tamaño. E efektonan di kambio di klima, polushon, sobrepeska i
espesienan invasivo ta e kousa mas importante di e deterioro akí. E konsekuensianan di esaki ta tantu
ekológikamente komo sosialmente indeseabel.
E áreanan di naturalesa akí ta di gran importansia pa biodiversidat i nan ta hunga un ròl krusial den
protekshon di e islanan kontra e konsekuensianan di kambio di klima. Mondi di palu di mangel ta yuda
por ehèmpel kontra e olanan di e tormentanan tropikal ku kada biaha ta bira mas frekuente. Banda di
esaki e áreanan di naturalesa ta un fuente importante di entrada pa habitantenan di e islanan, pa motibu
ku e refnan di koral ta forma un atrakshon turístiko.
Ku e kontribushon adishonal di 1,7 mion euro di Postcode Loterij, DCNA por dirigí su mes riba
proyektonan ku ta enfoká riba vários isla, pa di e manera ei realisá e impakto di mas grandi. Ehèmpel di
esaki ta proyektonan ku ta enfoká riba rekuperashon di mondi di palu di mangel i vegetashon riba tera.
Ta desaroyá i ehekutá e programa regional akí den kolaborashon ku e partnernan lokal di aliansa di DCNA
riba e seis islanan di Karibe Hulandes:
Aruba Conservation Foundation, CARMABI, STINAPA, Saba Conservation Foundation, St. Eustatius
National Parks Foundation (STENAPA) i Nature Foundation Sint Maarten. Wereld Natuur
Fonds-Nederland (WWF-NL) ta sostené e programa akí ku konosementu i fondo.
Arno Verhoeven, direktor di DCNA, ta bisa: “E kontribushon adishonal akí ta di un balor enorme pa DCNA
i pa e áreanan di naturalesa ku tin asina hopi mester di nos yudansa. Danki na e sosten di Postcode
Loterij i su partisipantenan, nos por ofresé un futuro seif i sostenibel na naturalesa den e parti karibense
di Reino Hulandes. Di kurason nos ke gradisí e partisipantenan na Postcode Loterij pa nan partisipashon.”
Komo organisashon, resientemente DCNA a pone pasonan grandi riba tereno di ‘good governance’ i ta
enkurashá e seis organisashonnan afiliá pa sigui su ehèmpel. Helen van der Wal, presidente di Hunta di
Supervishon di DCNA, ta kontentu ku e esfuersonan di ‘governance’ a aportá na e konfiansa ku Postcode
Loterij ta pone den e aliansa, di manera ku e kontribushon adishonal konsiderabel akí a bira posibel.
“Postcode Loterij por konfia ku nos ta bai hasi bon uso di e kontribushon!”
Jonne Arnoldussen, direktor general di Postcode Loterij: “Postcode Loterij ta orguyoso di por sostené
DCNA den su mishon pa protehá naturalesa den e parti karibense di Reino. Ku esaki e organisashon por
pone pasonan hopi importante den protekshon di e naturalesa úniko den e área karibense. Esaki ta
èkstra importante tambe, pa motibu ku hopi posibilidat di finansiamentu ku sí ta disponibel pa e parti
oropeo di Hulanda, no ta optenibel akinan, miéntras ku ta mas ku bale la pena pa protehá naturalesa
adekuadamente.”