Esun cu ta sin pica tira e prome Piedra.
Nos di Partido CURPA kier a informa e pueblo Cristian Arubano ariba nan pregunta, cu dicon CURPA no
a participa na e forum politico cristian cu a ser teni na un di e Iglesia afilia na ICA.
Primeramente nos organisacion politico CURPA no a wordo invita pa ta presente.
Secundo, ICA tin un plan estrategico pa sostene 14 candidatonan cristian cu ta aparese riba lista di MEP,
AVP y LPR pa bin cu e ley di referendum pa cambia nos constitucion. Mirando e secuencia cu e
candidatonan Cristian ta aparece riba e differente listanan politico lo no ta un garantia cu tur lo drenta
Parlamento. Esaki a keda demostra caba den pasado. ICA ta pone enfasis ariba e 18,000 firmantenan,
pa usa esaki como un arma pa logra nan meta, lagando DIOS afor. Nan ta lubida cu e partido cu a bin ta
vocifera pa e ley di referendum for di 2009 ta partido CURPA. Berdad ta cu pueblo cristian no a sostene e
ideanan ni a sostene partido CURPA su programa di gobernacion( pa cierto motibo) den e ultimo 15
añanan. Pero awe 15 aña despues nos por ripara cu partido Curpa tin razon ariba differente topico y
partido Curpa tin un di e miho plannnan pa cu e futuro di Aruba. Nos ta convenci cu e motibo principal cu
ICA no a invita nos, ta pasobra nos ta stroba nan plannan y fabornan politico. Nos kier enfatisa cu ICA su
trabao primordial ta pa conseha y no pa impone. Di kiko ta sirbi un candidato para pa moralidad y ta afilia
na partidonan politico INMORAL cu a aproba y ta para abiertamente contra diferente principionan di E
Palabra di Dios. Partido CURPA ta e unico partido netamente cristian y cu como partido ta para den su
totalidad pa principionan di beibel sin move na man drechi ni robes. ICA ta organisa un foro cu topico di
moralidad y ta enfoca moralidad na nivel individual pero no na nivel di partido politico. Moral no ta
problema sexual so, moral ta nifica ser integro, etico, honra, decente y husto. En fin tur actitud, accion,
creencia of pensamento contra precepto di loke ta moral ta inmoralidad. E voto Cristian te dia di awe no
ta refleha den nos Parlamento.
Nos ta hanja cu ICA a actua di mala fe. Despues di a reuni dos biaha cu ICA pa sa di unda e desacuerdo
contra partido CURPA ta bin, nos por a conclui na final di e reunion cu no tin nada cu lo por stroba pa den
futuro pa traha cu partido CURPA. Si ta obvio cu e mentalidad di ICA no a cambia , treciendo mentira,
confucion, manipulacion y division den e reino di DIOS, mandando un carta abierto pa nan miembronan
informando nan punto di bista, cu tin nada di haber cu e berdad. E berdad ta cu ta tin un problema
personal entre un miembro di partido Curpa cu un miembro di directiva di ICA, cu porcierto a wordu regla.
Lo tabata mas diplomatico como directiva di ICA pa pone un reunion cu tur nan miembronan di ICA pa
nan tambe por sa kiko a ser papia den secreto cu partido CURPA, asina creando un plataforma mas
transparente. Pero ICA a opta pa trata di hasi daño na partido CURPA den nan manera di actua. Kiko ta
nifica pordon entre cristian anto den e directiva di ICA??. Loke ta hasi e asuntonan aki mas grave ta cu
ICA ta insisti pa vota pa e cristianan ariba lista di partidonan socialista tradicional MEP, AVP y LPR cu ta
sostene e plan Sustainable Development Goals cu ta e agenda 2030. Un agenda cu ta contra di e famia
y contra di bienestar di nos yuinan. Un agenda satanico. Lo ta bon pa pueblo mes busca informacion pa
sa e significado di e 17 metanan aki y con nan kier realisè y ademas tin 169 puntonan mas su tras cu
hopi hende no sa mes, con desastroso e ta pa nos pais y mundo henter. Lo bo perde bo Libertad por
completo. Nos ta e unico partida cu a vocifera di ta contra e Agenda SDG2030 cu partido MEP a firma un
acuerdo pa realisa esaki y ta forma e programa di gobernacion di partido mep di 2025 pa 2029.
Nos di partido Curpa ta hasi un apelacion na ICA pa bin dilanti y expresa na e pueblo cristian na Aruba e
pakiko no a invita partido CURPA na e forum politico y no ta sostene Partido CURPA, un cos no sa sigur
como creyente, cu e berdad ta hasi nos liber. E logro mas grandi cu nos pueblo por beneficia di dje ta, pa
e amor di Cristo abunda den nos curazon pa nos por pordona di berdad manera e palabra di Dios ta siña
nos y biba cu otro den amor. Stima Dios cu henter nos ser y stima nos prohimo manera nos mes. Bo no
por bisa bo ruman cu bo ta stime anto bo tin odio den bo curazon contra dje. Corda cu esun cu a tira e
prome barranca no ta partido Curpa.
Max Robert
Presidente Partido Politico CURPA
