Diabierna, porfin despues di 5 aña y 3 luna cu e caso aki ta andando, oficialmente defensa di Otmar Oduber lo tin oportunidad pa desenmascara cada un di e suposicionnan presenta den sala di corte pa Ministerio Publico. Ta trata di conclusionnan cu nan a saca, pero no tin ni un prueba, pasobra no tin un hende cu ta acusa Otmar Oduber den henter e caso, no tin ni un hende cu a ofrece ni un cent preto pa a duna un tereno of un trabou.
A para bira cu si ta forma parti di un partido politico y a haya un trabou, a pesar cu a cana henter e caminda y a cumpli tur e reglanan, e no por yega na remarke pa haya un trabou.
Papiando riba e acusacion di nombracion di 7 persona, Otmar a indica cu tur director cu ta wordo bisa den e acusacionnan cu e lo a pone presion riba nan pa politicamente nombra e hendenan aki, nunca nan a wordo scucha door di Ministerio Publico. Riba peticion di Otmar Oduber y como testigo, cada un di e directornan aki y management team cu tabatin na DIP, Serlimar y DOW, den nan declaracionnan na rechter commisaris y cu lo bin diabierna awo dilanti, ta ratifica cu no solamente no tabatin metemento politico, sino cu nunca nan a ricibi of sinti presion, y mas ainda, nan a describi e proceso manera cu e hendenan a wordo tuma den e instancianan conforme e regla y leynan cu nan tin. Ta trata aki di Sr. Marlon Croes, Sr. Davelaar, Sra. Werleman, Sr. Croes y Sr. Errol Sjak-Shie.
Otmar ta bisa cu si e la haya 1 of 2 whatsapp di hende cu despues di a haya nan trabou ta gradicie, pero ta ken na Aruba ora e haya un vergunning, un tereno, un permiso, of kico cu ta, y ta topa e minister riba caya no ta gradici’e. “Otmar Oduber no a participa den eleccion 2021, kiermen cu Otmar Oduber no mester a haci ningun fabor na ningun hende pa e haya voto. Mayoria di e 7 hendenan cu a wordo nombra, a wordo nombra pa e departamentonan/sui generis, entre e periodo di september 2019, ora mi a anuncia mi retiro, cu 12 di december 2019, ora mi a retira”.
Esaki y tur otro prueba lo wordo presenta na hues diabierna awo, hues lo bay scucha di tur e testigonan cu Ministerio Publico no kier a scucha. Mientras cu ta acusa Oduber di a forsa directornan pa tuma hende den servicio, pero di otro banda no a scucha e directonan nunca. Tur e directornan aki, den e ultimo getuigenverhoor a declara un pa un, cu e cos aki ta absurdo.
“Aruba no ta sali gana, e caso aki no ta nada otro cu purba influencia un biaha mas e decision di e comunidad aki pa e eleccion cu ta bin nos dilanti.P’esey Otmar a scohe pa publicamente hiba mi defensa y diabierna awo defensa lo tuma lugar den corte caminda cada un di e acusacionnan aki lo wordo desenmascara y desbarata, pasobra no tin nada. Di un criminal cu supuestamente lo tabata laba placa y bende terenonan pa miyones pa algun hende cu supuestamente lo a wordo nombra y un cu a haya tereno entre 1800 cu tambe a haya, pasobra kier pone cosnan drechi na DIP.
Comunidad di Aruba boso por ta sigur y tin e fe cu den e proximo gobierno nos lo continua cu un maneho habri y transparente a base di e programa, di e plan cu partido PPA a presenta. Un plan caminda cu nos ta bisa cu nos ta para pa haci cambionan radical na fabor di e comunidad aki, di e pueblo di Aruba. Nos ta bay cuminsa cerca nos mes, caminda cu nos ta bay baha gasto di gobierno cu 12% pa nos por duna nos pensionadonan bek nan remedinan, pa elimina e bashi cu e pensionadonan tin pasobra e entrada cu nan tin no ta yega pa nan por come tur dia. Nos ta bay baha gastonan di gobierno pa hunto cu AZV duna contenido bek na salubridad na Aruba caminda hendenan no tin cu bay warda 6-7 luna pa nan por wak nan dokter. Pa nos hendenan por haya nan remedinan bek. Nos compromiso ta cu e pueblo”.
Otmar Oduber a bay e contienda politico aki cu e fervor di sa y cu pueblo di Aruba sa for di delanta kico tabata e plan di Ministerio Publico y p’esey awe e ta gradici Dios, su tata y su ruman homber cu ta cuid’e di ariba pa e gui’e y guia e pasonan cu e ta tuma. Na momento cu el a tuma e decision di bolbe politica, a sabiendas cu e caso ta tuma lugar, ta pasobra cambionan grandi lo bin na december pa bida di Otmar Oduber y pa pais Aruba.
Awe cu por a scucha kico Ministerio Publico ta tras di dje, pueblo por ta confia cu Otmar hamas den su funcion el a ricibi un florin of un fabor. A bay asina leu cu e placa cu a wordo confisca e tempo ey na cas di su mayornan, placa di dje, di su mayornan y di su yiunan, tur a wordo debolbi bek, sin cu un dia Ministerio Publico a haci Otmar ni un solo pregunta den e 5 añanan y 3 luna di e caso riba e fondonan aki. “Simplemente pasobra no tabatin nada robes. Semper ma funciona den forma habri y transparente”.
Diabierna tur suposicionnan di Ministerio Publico contra Otmar Oduber lo wordo desbarata
