Despues di ocho edishon eksitóso di Pasku Solidario partido MAN – PIN ta kontinua
e aña aki ku e bunita tradishon aki. Un biaha mas e bunita akshon di Pasku Solidario
lo aportá pa famianan rònt Kòrsou den nesesidat. Temporada di Pasku ta sinónimo
di bondat i solidaridat. Teniendo kuenta ku e situashon ekonómiko difísil ku gran parti
di nos komunidat ta pasando aden, MAN – PIN ta di opinion ku nos mester saka un
man pa yuda nos rumannan den nesesidat. Dor di duna un man nos ta aportá na e
sentimentu di solidaridat kual ta un di e pilarnan di e ideologia di MAN-PIN.
MAN -PIN pa medio di e komunikado aki ta hasi un petishon na nos komunidat pa
wikènt benidero dia 30 di novèmber duna nos un man pa kuminsa kolektá produkto
pa nos rumannan. Nos ke pidi kada pèrsona, pa na momentu di hasi kompras na
supermarket preferí den e dianan benidero, kòrda riba nos rumannan den nesesidat
dor di kumpra i trese loke ta na bo alkansé na komestibel na Sede di partido MAN-
PIN. Ku e produktonan kolektá lo traha paketenan di Pasku pa por parti rònt Kòrsou.
Djasabra 30 di novèmber próksimo entre 9:30 di mainta pa 12 or di mèrdia na sede
di partido MAN-PIN na Rooseveltweg, partido MAN-PIN lo bai kolektá produkto pa
yuda famianan den nesesidat. Kada pèrsona ku ta desea di duna un man na e
edishon akídi Pasku Solidario por kontribuí ku un di e siguiente produktonan:
• Pasta, aros, funchi
• Mashed potato na paki
• Bèrdura na bleki òf bòter
• Lechi na bleki, paki òf puiru
• Bleki di corned beef, paki di bakiyou
• Bleki di tuna, saldinchi, spam, sosechi
• Pindakaas, djèm, Chocolade pasta, muisjes
• Zeta pa kushina
• Te, kofi, chocolati na puiru, djus
• Kètsup, suku, salu
• Fruta den bleki òf bòter
• Kualke otro produkto ku bo ta desea.
Na momentu di aportá, por fabor paga bon tinu riba e fecha di vensementu di e
produkto.
Na nòmber di Partido MAN -PIN nos ta gradisí kada pèrsona pa nan aporte na
Pasku Solidario 2024. Ku bo donashon den e temporada bunita aki pa nos
rumannan den nesesidat, bo tambe ta demostrando solidaridat no solamente ku
palabra sino tambe ku echo.
