OM: Caso Flamingo

Ministerio Publico a pidi awe un castigo incondicional di 3 aña den e caso penal ‘Flamingo’
contra e politico O.E.O., minister anterior di Desaroyo di Espacio, Infrastructura y Medio
Ambiente (ROIM). O. a wordo acusa di a haci su mes culpable di soborno, fraude cu
otorgamento di tereno di erfpacht y contratacion di ambtenaarnan spirito, y abuso di su cargo
den e periodo di 2017 te 2019.
Ademas di e castigo di prison, Ministerio Publico a exigi pa kita e derecho di O. di wordo elegi
den un cargo publico (passief kiesrecht) pa duracion di 6 aña; esaki ta conta tambe pa e
derecho pa ocupa e funcion di ambtenaar.
Ministerio Publico a ademas pidi castigonan incondicional contra e cuatro otro sospechosonan.
Contra e sospechoso E.F. E. fiscal di husticia a pidi un castigo di prison di 18 luna. E. ta wordo
acusa di tabata involucra den soborno y abuso di funcion como ambtenaar na bureau di
minister.
Contra e sospecho R.I. W.C. fiscal di husticia a exigi un castigo di trabao pa comunidad di 240
ora y un castigo condicional di 6 luna. W.C. ta wordo acusa di a haci su mes culpable di fraude,
falsificacion di documentonan y abuso di funcion como trahador di DIP.
E sospechoso L.B. P. a wordo marca como un asina yama ambtenaar spirito. E ta wordo acusa di
a estafa Pais Aruba. Ministerio Publico a exigi un castigo incondicional contra dje di 6 luna y a
ademas anuncia un ontnemingsvordering.
E sospechoso J.A. O. a wordo acusa di fraude contra Pais Aruba dor di pone un otro sospechoso
traha pe, pero riba payroll di gobierno a traves di un trabao ficticio. Fiscal di husticia a pidi un
multa di Afl. 25.000,- y un castigo di trabao pa comunidad di 180 ora contra O.
E investigacion Flamingo, cu a cuminza na aña 2019, tabata dirigi riba iregularidadnan den e
ministerio di O.E. O. Ministerio Publico ta tuma O. severamente na malo cu el a usa su
influencia y poder pa favorece amigonan y conocirnan of duna nan un trato preferencial. E
comportacion aki a atacha confianza di e ciudadano den un gobierno integro.