Partido MEP:
Partido Movimiento Electoral di Pueblo den su programa di campaña tin diferente solucion pa e retonan di pais Aruba.Awor cu a crea espacio financiero, Partido MEP ta bay enfoca riba 7 punto di prioridad;
PRIORIDAD #5: PENSIONADONAN
Nos adultonan mayor durante e ultimo añanan a pasa den situacionnan dificil. Por a mira con e edad di pensioen a wordo aumenta pa e gobierno prome cu Gabinete Wever-Croes y e tempo ey e pensioen no a wordo aumenta apesar cu e gobierno e tempo ey tawatin placa pa haci’e. Mescos pa loke ta trata e impuesto cu pensionadonan ta paga, cu tambe ta un peso grandi pa nan.
Prioridad#5: Pensionadonan
Sigui aumenta e pensioen di biehes, na un forma responsabel
Desde cu MEP a drenta Gobierno 7 aña pasa, a cuminsa traha pa mehora e posicion financiero y e cuido di nos adultonan mayor, nos pensionadonan. Aaumenta e pensioen di biehes varios biaha y dene puntonan di prioridad di Partido MEP tin e compromiso pa sigui hisa e pensioen di biehes. Esaki na un forma responsabel. No por redobla e pensioen, pasobra esey lo kibra e fondo di pensioen, pero cu pasonan responsabel.
Sigui reduci e peso di impuesto riba pensioen
Tambe Partido MEP lo traha riba e tema di e impuesto. Ya Gobierno a baha e impuesto di nos grandinan considerabelmente y e 4 añanan nos dilanti lo sigui baha esaki.Tambe pensionadonan cu tin dospensioen lo no paga belasting mas.
Mehora e cuido di nos grandinan
Awor tin espacion financiero, pa loke ta trata cuido di nos grandinan, esaki tambe lo haya extra atencion den e 4 añanan nos dilanti. Un adulto mayor cu dicidi di keda na su cas, mester haya e cuido na su cas. Si e adulto mayor kier bay un cas di cuido, mester tin espacio na e casnan di cuido y un bon calidad di cuido.
Remedinan lo wordo cubri bek door di AZV
E remedinan pa adultonan mayor lo cay bek bou e pakete di AZV y no mester paga niun remedi mas. Esaki ya Gobierno di MEP ta trahando riba dj’e caba pa basta tempo. Estudionan riba esaki ta cla, a bin un mocion di Parlamento y awor Gobierno ta cla pa cumpli cu e compromiso cu pensionadonan y nan no ta bay paga niun remedi mas.
Cuido di salud
Partido MEP lo sigui traha pa mehora cuido di salud di nos grandinan. Lo traha pa elimina lista di espera pa specialistanan y amplia e ekipo medico di specialistanan geriatra.
Nos pensionadonan ta e fundeshi di nos pais y p’esey awor cu nos Gobierno a stabilisa e pais y tin espacio financiero, ta bay pone extra atencion pa mehora e calidad di bida di nos pensionadonan, adultonan mayor, nos dushi grandinan.
Esaki ta un prioridad pa Partido Movimiento Electoral di Pueblo.
