Maldad, envidia, duresa di curason, falta di pordon, orguyo, y egoismo, dia pa dia ta aumenta mas, ta
parce manera hende no kier comprende, con e diabel tey pa solamente pa horta, pa mata y pa destrui,
pero ora nos pone Dios na prome lugar den nos bida, Dios semper ta y lo haci manera Dios kier.
Dios no ta hende, cu E lo gaña, ni yiu di hende, cu E lo repenti,Acaso E a bisa, y E lo no hacie? Of E a
papia, y E lo no cumpli?( Numbernan 23:19).
Dios ta Todopoderoso, Omnipotente, Dios ta Dios riba tur cos, cielo y tera lo pasa , ma su palabra lo
no pasa, Su poder ta manifesta, y lo manifesta semper riba e mundo aki, pasobra ta Dios ta doño di tur
cos.
Poder di materialismo, placa, corupcion, nunca por alcansa y tampoco haci nada contra e grandesa di
Dios.
Pesey David a bisa: Lo mi halsa mi wowo na e sero nan for di unda mi yudansa lo bini? Mi yudansa ta
bini di Señor, Kende a traha cielo y tera.( Salmo 121:1-2).
Ora nos pone nos bista riba cosnan di mundo, ora amistad cu mundo, ta mas serca di nos curason cu
amistad cu Dios, decepcion ta para tras di e porta di nos bida, pasobra solamente Dios ta ofrece cosnan
eterno, tur locual mundo ta ofrece ta temporal.
E curason di hende ta wordo engaña, pasobra diabel ta e gran mentiroso, palabra di Dios ta avisa nos
cu hasta e fielnan lo wordo engaña, pesey nos wowo mester ta habri den e tempo trabahoso cu nos ta
bibando, y asina aserca Dios den oracion pa nos keda cana riba e caminda di berdad.
Mi pueblo ta perece pa falta di conocemento. Pasobra bo a rechasa conocemento,Ami tambe lo
rechasa bo di ta Mi sacerdote. Como cu bo a lubida e ley di bo Dios. Ami tambe lo lubida bo yuinan. (
Oseas 4:6).
Si nos como mayor no pone atencion na e Palabra di Dios, e lo bira dificil pa nos lanta nos yuinan,
pasobra ora un mucha ta mira su mayornan ta sirbi Dios, e mucha ta wordo atrae pa e Palabra di Dios
y pa e testimonio cu e ta mira den bida di Su mayornan. Pero ora e mucha no ta mira su mayornan ta
busca Dios, e no tin respaldo spiritual, y un mucha asina facilmente ta cay den scuridad.
Bendiciona ta esnan cu ta confia den Señor, pasobra Señor ta nos Baranca Fuerte, di berdad, di berdad,
tin hopi cos cu hende kier pone dilanti di Dios, tin hopi cos cu hende ta mira mas interesante cu Dios,
tin hopi idolatria, y falta di respet pa Dios, y falta di temor y reverencia na Dios.
Pesey ora malesa y necesidad bati na porta, hende ta grita, hende ta yora, y Dios ta mustra Su
misericordia, pasobra nos por ta infiel na Dios, Dios semper ta keda fiel.
Tur loke ta agrada Señor, E ta haci den cielo y riba tera, den e laman y den tur e profundidadnan.(
Salmo 135:6).
Fiel ta esun cu ta yama boso, y E lo haci esaki sosode tambe ( 1 Thesalonisensenan 5:24).
Hopi biaha Hesus ta ripiti, pa nos no lubida, bisando no tene miedo, pasobra si Dios ta cu nos ta miedo
di ken nos lo tin?
No laga nos cansa di haci bon,pasobra na debido tempo nos lo cosecha, si nos no desmaya.(
Galationan 6:9).
Tur locual Dios a priminti, Dios ta capas pa cumpli cune, Dios ta semper fiel.
Sinceramente, Pastor Marcel Balootje.
.