LVV ta kuminsá ku proyekto nobo pa monitoreo di peskeria na Boneiru

Departamento di Agrikultura, Krio di Bestia i Peskeria (LVV) di entidat
públiko Boneiru a kuminsá e aña akí ku un proyekto pa akumulá informashon balioso
tokante peskeria den laman rònt di Boneiru. Meta di e proyekto akí ta pa haña mas
konosementu di e situashon aktual di peskeria i populashonnan di piská, i pa salbaguardiá
kontinuidat di aktividatnan di peskeria pa futuro.
LVV ta hasi un yamada na tur piskadó lokal pa kompartí informashon ku lo yuda pa
mehorá i konservá nos sektor di peskeria. E proyekto ta enfoká riba partisipashon
boluntario di piskadónan ku ke kompartí nan eksperensianan i informashon tokante e
piskánan ku nan ta kue.
Komo piskadó, gustosamente nos ke risibí e siguiente informashon, entre otro:
 Kuantu tempu bo ta (a) dediká na piskamentu;
 Kuantu piská i ki tipo di piská bo a kue;
 Largura di peso di e piská ku bo a kue;
 Na unda mas òf ménos bo a piska (òf na unda bo a kue mas tantu piská);
 Kiko bo a usa (método i material);
 Kuantu liña bo a pone den awa;
 Si bo ta un ‘charter’ òf nò;
 Den kaso ku bo no a kue nada, esaki tambe ta importante pa menshoná.
Nos ta trata tur informashon ku nos akumulá anónimamente i nos ta usa nan solamente
pa metanan di análisis i raportahe. LVV ta sigurá ku no ta registrá informashon personal,
manera nòmber i number di boto. Ta analisá e informashonnan na Hulanda i kada seis
luna LVV lo pone un resúmen disponibel pa tene e piskadónan i komunidat na altura di e
konklushonnan i tendensianan.
E proyekto su ophetivo no ta solamenta pa duna sosten na e aktividatnan aktual di nos
piskadónan, pero tambe pa kontribuí na e strategia riba término largu pa un peskeria
sostenibel na Boneiru. Nos ta invitá piskadónan ku nos no a aserká ainda, pero ku ke
partisipá na e proyekto importante akí, pa tuma kontakto ku LVV via e number di telefòn
+599 717 6734.