Na Boneiru nos ta konfrontando un eskases grandi di bibienda adekuá. E
lista di hende ku ta warda riba tantu un kas di hür sosial, komo un parsela di èrfpagt pa
por konstruí nan propio kas, ta largu. E lista di hende ku ta wardando riba un parsela di
èrfpagt asta ta data for di 2011. Den e tempu tras di lomba a hasi hopi trabou pa loke ta
trata aktualisashon di e lista akí. Pensa akí riba personanan ku entretantu a fayesé, òf ku
no ta biba mas na nos isla òf hendenan ku entretantu ya kaba ta disponé di un kas ku nan
a kumpra òf ku ta kasá ku un hende ku ya kaba a haña un parsela di èrfpagt. Vishon di
Kolegio Ehekutivo ta ku tur hende ku ta biba legalmente na Boneiru tin derecho riba un
bibienda adekuá i no nesesariamente derecho riba un parsela di èrfpagt.
Ordenamentu Teritorial
For di 2010 Boneiru a krese for di mas òf ménos 15.000 habitante te na 25.000 habitante
na aña 2024. Esaki práktikamente sin adaptashon di e struktura urbano eksistente. Pa un
kresementu sólido, pero prinsipalmente responsabel, ta nesesario pa laga e kantidat di
bibienda, e infrastruktura i e fasilidatnan (sosial) krese òf kambia simultaniamente. Den
esaki un aserkamentu planológiko kuidadoso ta esensial, pa motibu ku nos tin ku konstatá
ku ordenamentu teritorial di nos isla a keda tras kompará ku e kresementu akí. Esaki ta e
motibu ku nos ta trahando duru riba un dokumentu di maneho stratégiko, un asina yamá
‘structuurvisie’, ku ta bai sirbi komo base pa aktualisashon di e legislashon i regulashon
nesesario. Pa esaki e Plan di Desaroyo Teritorial di Boneiru aktual (di 2010) no ta
sufisiente mas.
Segun diputado Cicilia, no por sigui mantené e idea ku tur hende lo tin derecho riba un
parsela di èrfpagt. Pa motibu di espasio limitá e filosofia akí no ta sostenibel tampoko. Tur
hende tin derecho riba un bibienda adekuá i ta trata pues di un situashon kaminda dentro
di e espasio disponibel nos por proveé tur hende ku un bibienda adekuá. Pa esaki
stipulashon di áreanan di biba i traha pa den futuro ta un promé paso importante.
E definishon òf vishon di ki tipo di isla nos ke ta, tambe ta importante den esaki. Sigui
krese ta bon, pero solamente ku konservashon di nos kultura, naturalesa i trankilidat i tur
e balornan ku nos ke protehá.
Státùs di emishon di parsela di èrfpagt
Kiko a tuma lugá kaba? Den kuadro di saniamentu di e lista di espera, nos ta manda
karta pa e personanan riba e lista di espera, ku no ta bini na remarke mas pa un parsela
di èrfpagt: sea nan a fayesé, nan no ta biba mas na Boneiru òf entretantu nan tin un
parsela na èrfpagt kaba. Esaki a tuma lugá den kordinashon ku Kadaster. Ta trata akí di
un lista di 85 persona ku nos lo informá ku nos ta baha nan for di e lista di espera.
Aktualmente nos ta hasiendo e preparashonnan pa e siguiente transh. Ora ku nos baha
85 persona, e personanan ku keda riba e lista di espera ta skùif bai ariba. Seguidamente
nos ta aserká 60 persona ku segun sekuensia di e lista di espera ta na turno pa nos
ofresé nan un parsela di èrfpagt. T’asina ku gobièrnu a identifiká 60 parsela dentro di
áreanan residensial plamá riba nos isla, ku ta bini na remarke pa emishon. Ta trata di
parselanan ku ta situá na un kaminda asfaltá i kaminda tin infrastruktura pa awa i koriente
tambe presente.
Diputado Cicilia ta indiká di ta hopi kontentu ku riba término kòrtiku lo konsedé 60 parsela
na èrfpagt. “E parselanan akí ta resultado di un inventarisashon minusioso den barionan
eksistente. Den esaki a identifiká parselanan ku no tabata emití ainda i ku ta situá den
serkania di infrastruktura eksistente i otro fasilidatnan. Un logro importante!”
Aresto Didam
Ta keda di importansia pa mèldu ku na fin di aña 2021, Korte Supremo (Hoge Raad) den e
‘Aresto Didam’ a husga ku entidatnan di gobièrnu, na momentu di aktua a base di derecho
privá, manera benta di tereno, hür òf èrfpagt, tin e obligashon pa ofresé espasio pa
kompetensia na tur kandidato potensial den forma di un prosedura públiko di selekshon.
Den un grado haltu esaki ta influensiá tambe e proseso di emishon di parsela di èrfpagt na
nos isla.
Laga nos bai bèk na e derecho riba bibienda adekuá. Kolegio Ekekutivo ta realisá su mes
bon ku e nesesidat akí ta hopi grandi i pa e motibu akí nos ta atendé ku e tarea akí ku
prioridat haltu. E enfoke ta kompletamente riba oumento di e stòk di bibienda pagabel.
Nos ta bai hasi esaki ku vários desaroyo di área ku ta bai proveé den esaki. "Ku
determinashon i poniendo paso pa paso den e direkshon korekto”, segun diputado Cicilia.
