E kandela ku a surgi na lèntfel di Selibon den anochi di 5 di novèmber, pa un
gran parti a kaba kima. Sinembargo te ainda tin kestion di desaroyo di huma.
Konseho di siguridat pa hendenan ku ta biba den bisindario, kuminda i bestia
Den huma tin supstansia dañino. Pa e motibu akí ta importante pa evitá kontakto ku
huma. For di midimentu ku den pasado nan a hasi na Hulanda, a resultá ku
prinsipalmente riba un distansia di ménos ku 300 meter for di e kandela, supstansia
dañino ta bini liber. Mas leu ku 1 kilometer for di e kandela, de fakto no por midi
supstansia dañino mas. A base di e informashonnan akí a ofresé un ubikashon di estadia
alternativo na e hendenan ku ta biba den bisindario, esta den un rayo di 1 kilometer for di
e kandela.
Mas leu ku 1 kilometer for di e kandela ainda por surgi keho. E holó di huma i e stòf fini ku
a surgi, por kondusí na iritashon di wowo òf via respiratorio (nanishi, garganta, pulmon).
Hende ku keho eksistente di via respiratorio i/òf keho kardiovaskular (kurason, preshon
haltu) por keda afektá mas tantu. Nan ta haña konseho pa sòru pa un lugá seif den kas ku
portanan i bentananan será, i si ta posibel ku èrko riba sirkulashon interno.
Si esaki no ta posibel, ta mihó pa haña un lugá ku mas distansia for di e huma, kaminda no ta
eksperensiá iritashon. Si e kehonan no bai, e ora ei tuma kontakto ku bo dòkter di kas.
Dentro di un rayo di 1 kilometer for di e kandela, ta mihó pa no kome fruta òf bèrdura ku
bo mes a kultivá. Si bo por kita nan kaska, e ora ei sí ta posibel pa kome nan.
Investigashon di supstansianan ku a bini liber
Debí na e kandela tin sierto supstansianan peligroso ku a bini liber. Ku ayudo di
ekspertisio eksterno ta trahando duru pa haña sa den ki grado esaki ta e kaso. Asina ku
tin mas informashon disponibel, nos lo kompartí esaki.
