‘Pa promove y conscientisa riba e importancia den proteha nos Flora y Fauna unico’
Aruba Tourism Authority (A.T.A.) a uni su mes na un proyecto unico, ‘Wow! The Nature Film’, presenta pa
Reino Hulandes y dirigi pa EMS Film/M&N Media Group di Hulanda. E proyecto ta un oda na e bunitesa,
vulnerabilidad, y resiliencia di e seis islanan Caribense—Aruba, Corsou, Boneiro, Saba, Sint Maarten, y
Sint Eustatius.
E proyecto ta inclui un pelicula cinematografico cu lo wordo emiti na cinema na Hulanda y na e islanan
mes. E pelicula lo enfoca riba e diversidad y e gran balor ecologico di cada isla y e relacion intimo cu ta
uni nos comunidad cu e medio ambiente.
Aruba ta den un momento crucial di desaroyo, caminda turismo ta keda contribui fuertemente na nos
economia. Pero si nos mira e realidad di regionnan cu ta sufri crisis climatico, ta evidente cu si nos no
cuida nos medio ambiente y pone e topico di cambio climatico como prioridad, e stabilidad di e progreso
aki no lo keda uno sostenibel.
‘Wow! Dutch Caribbean Uncovered’ ta un ehempel di un paso proactivo pa celebra y comparti e
importancia den proteha nos bunitesa natural. E proyecto lo yuda trece un comprension mas profundo y
un motivacion pa proteha e medio ambiente cu ta clave pa un futuro sostenibel.
Banda di un pelicula principal, lo tin un docuserie di seis parti cu lo explora e relacion special entre hende
y naturalesa na cada isla. E docuserie lo wordo transmiti riba television Hulandes y riba plataformanan di
streaming global. Cu e meta pa inspira y amplia e conscienticacion y pa brinda mas conocemento di e
medio ambiente y naturalesa Caribense.
Adicionalmente, lo tin un programa educativo y di conscientisacion destina pa scolnan y companianan,
tanto na Hulanda como na e islanan mes. E meta di esaki ta pa desaroya un sentido di responsabilidad pa
e medio ambiente desde un edad tempran, y pa motiva companianan pa contribui na un Aruba mas
sostenibel. Otro aspecto importante di e proyecto ta un soundtrack original pa e pelicula cu lo wordo
componi y interpreta pa artistanan local, elevando y introduciendo e musica di e region na un publico
mundial y di es manera aki tambe agregando otro aspecto autentico na e proyecto. Lo invita escritornan,
videografonan y fotografonan local pa contribui na e proyecto pa ilustra e identidad cultural di Aruba.
Alabes, e proyecto lo inclui un podcast cu ta conta e historia di nos naturalesa y nos hendenan, y un
database cientifico pa colecciona tur investigacion, fortalece e base di informacion pa segura cu nos ta
cuido nos sistema ecológico na un forma corecto.
Pa un conexion mas eficiente cu audiencia global y di e islanan, lo tin un strategia di mercadeo riba
plataformanan social manera; Facebook, Instagram, LinkedIn, TikTok, y YouTube. E contenido lo ta basa
riba e desaroyo continuo di e proyecto pa atrae tanto e mercado Hulandes y tur otro persona cu ta stima e
islanan.
E proyecto lo cuminsa graba den e di cuater kwartaal di 2024, caminda cu e series di podcast lo wordo
lansa den di dos kwartaal di 2025. E docuseries ta plania pa wordo lansa entre e di cuater kwartaal di
2025 y e prome kwartaal di 2026. Encuanto e pelicula cinematografo, e meta ta pa estrena esaki tanto na
Hulanda como na e islanan Caribense den di cuater kwartaal di 2026. Pa 2027, e pelicula lo ta disponible
riba plataformanan di streaming global. Pa mas informacion por bishita www.wowthenaturefilm.com.
Un proyecto sosteni pa otro socionan, di entre otro, Setar, Centrale Bank van Aruba, Prins Bernhard
Cultuurfonds, HBN law & tax, Kooyman, y mas na caminda.
Na final esaki lo bira mucho mas cu solamente un proyecto; e lo bira un movemento pa conscientisa y
proteha e tesoro natural di Aruba y e islanan riba un nivel mundial. Esaki ta alinea cu A.T.A. su strategia
pa yega na un futuro caminda tanto residente como huespednan por conecta profundamente cu e
naturalesa y cultura unico di Aruba.
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion
independiente den e esfera publico. Aruba Tourism Authority ta fungi como ‘Destination Marketing and
Management Organization (DMMO)’ y ta responsabel pa uni interes turistico entre socionan local e
internacional. A.T.A. ta pone hopi enfasis riba e modelo di “High Value-Low Impact” cu ta para pa un
balanse entre aumenta e balor economico di e bishitante, posiciona Aruba como un pais desea y
sostenibel, y posiciona Aruba como lider di desaroyo como un destinacion. Cu meta pa sigui mantene
esfuerzonan den linea segun e balanse menciona, y logra aumenta entrada pa medio di calidad di turismo
en bes di e volumen cu nos destinacion ta ricibi. Capacidad di carga ta sigui ricibi atencion di parti di
A.T.A.
