Integridat ta nifiká un aktuashon honesto i étiko, ku konsistensia entre palabra i
akshon i ku ta sigui moral i prinsipio den tur situashon. Kòrsou tin un nesesidat
úrgente pa establesé un Kámara di Integridat, segun Giselle Mc William lider politiko
di MAN-PIN.
Esaki ta un paso esensial pa yuda aumentá transparensia, dunamentu di kuenta di
uso di plaka di pueblo i integridat den nos institushonnan públiko ku MAN-PIN ta
para p’e. Den e gobièrnu anterior a prepará bou di èks minister di MAN e trayekto di
lei aki. Di kual pa 2021 a pone fondo den presupuesto pa bini ku kamara di
integridat. Pa nos esaki ta importante pa Gobièrnu duna kontinuidat na dje.
E lei di Kámara di Integridat ta di importansia spesial pa un isla chikí manera Kòrsou,
kaminda e vulnerabilidatnan den gobernashon por tin un impakto grandi riba
stabilidat social-ekonómiko, konfiansa públiko, i prinsipionan demokrátiko.
Transparency International, a indentifiká áreanan importante ku mester di reformá pa
bai kontra e riesgonan di korupshon. Korupshon ta manera un kanser ku mester
prevení i kombatí paso e ta empedí desaroyo ekonomiko sostenibel i ta aumenta
pobresa i desigualdat.
Un Kámara di Integridat lo ta un instituto independiente pa wak riba, investigá, i hasi
rekomendashon riba komportashon étiko, desishonnan i proseduranan manera por
ehèmpel di destahónan públiko, prosesonan di solisitut èts. Pa un pais ku tin un
populashon di 150 mil hende, transparensia no ta solamente un pilar di gobernashon
demokrátiko, pero tambe un nesesidat pa prevení korupshon ku por debilitá
ekonomia i kibrá konfiansa den nos institushonnan.
Establesimentu di un Kámara di Integridat, segun lider polítiko di MAN-PIN, ta den e
lista di kompromisonan ku Gobièrnu di Kòrsou mester realisá pa por aportá na bon
gobernashon, garantisá integridat den sektor públiko, i krea un ekonómia mas fuerte.
MAN-PIN ta hasi un yamada úrgente na Gobièrnu pa hasi e finalisashon di e lei di
Kámara di Integridat un prioridat. Banda di introdusí e Kámara di Integridat, pa MAN-
PIN ta sumamente importante pa ademas fortifiká tur nos organo(nan) manera
Kuerpo hudisial(OM, Polis i Landsrechereche), ARC, RVA, SER, OMBUDSMAN den
e kuadro pa salbaguardia integridat i kombatí korupshon.
Di e manera aki nos ta traha na un Kòrsou ku ta transparente, konfiabel i
komprometé pa sirbi e interesnan di su pueblo i kombatí korupshon.
Kámara di integridat mester ta un prioridat pa protehá futuro di kòrsou
