Ta ku hopi asombro miembro di Parlamento pa Frakshon di MFK, Ramón
Yung, a tuma nota di ekspreshonnan hasí pa líder di partido MAN/PIN (lesa MIN), sra. Giselle
McWilliam, indikando ku Minister Silvania ta bende flor pa fruta. Esaki ta demostrá ku sra.
McWilliam tin hopi kurashi i ku su kara no tin wesu.
E lider di MIN ta indiká den su komunikado ku nan a tuma nota dje rapòrt di e komishon di
evaluashon di e lei di konsenso finansiero RFT titulá “Perspectief en Eigenaarschap”, den kual
rapòrt ta konkluí ku Kòrsou ainda no ta kumpli ku e normanan di maneho finansiero duradero i
disiplina di presupuesto. A base di esaki e komishon a konsehá gobiernu di Reino pa prolongá e
supervishon finansiero ku 3 aña mas.
E lider di MIN ta indiká ku Minister Silvania ku un aktitut di supremasia durante ultimo 3 añanan
a bin ta bende su mes komo e mihó minister di finansa di tur tempu i ku ta surplus tras di surplus
so tin riba presupuesto ku su maneho rígido di kobransa di impuesto. Sinembargo ta resultá ku
tur e frutanan ku minister Silvania a bin ta bende pueblo, a resultá ku nan no ta fruta, sino flor.
Parlamentario Ramón Yung ta di opinion ku e ekspreshonnan hasí pa lider di MIN, sra. Giselle
McWilliam mas bien ta demostrá un aktitut envidioso riba e aktual minister di finansa sr. Javier
Silvania, pasó e èks minister di finansa sr. Gijsbertha di MIN, durante su periodo di gobernashon
NO a logra esaki.
Ademas, e lider di MIN ta indiká ku minister Silvania a bende flor pa fruta. Ta bon pa e lider di
MIN profundisá un poko mas den e proseso di kultivo, pasó promé ku un palu duna fruta, e ta
saka flor. Pues, si lokual minister Silvania a bende e pueblo ta flor, esei ta nifiká ku ainda e
frutanan mester bin ainda.
E lider di MIN, sra. Giselle McWilliam ku su ekspreshonnan ta purba tapa e mal maneho
finansiero ku e èks minister di finansa, sr. Gijsbertha a hiba, pasó durante su maneho el a bende
pueblo un mata TUR na ANGLO, anto sin ni sikiera UN FLOR!!!
E lider di MIN, sra. Giselle McWilliam ta demostrá nada mas ku temor pa e próksimo elekshon,
pasó ku e resultadonan dje flornan ku minister Silvania a bende pueblo ta asina’ki, ora ku e trabou
realisá duna fruta, esei lo ta e faktor pa kaba mortifiká e lider di MIN i tur otro kontrinkante
politiko di envidia.
Lider di MIN ademas den su komunikado emití, ta purba na tira santu den wowo di pueblo,
indikando ku di akuerdo ku e komishon di evaluashon, presupuestonan di añanan 2022 i 2023 tur
tin défisit i no surplus manera minister Silvania ta indiká.
Parlamentario Ramón Yung ta komprondé ku sra. Giselle McWilliam ke tira santu den wowo di
pueblo, pero e rapòrt “Perspectief en Eigenaarschap” riba pagina 17 ta indiká ku pa loke ta
“Saldo-ontwikkeling”, Kòrsou na 2021 kontrali na defisit presupuestá di 822 mion florin, a sera
2021 ku un saldo negativo di 362.7 mion florin. Kontrali na un défisit presupuestá di 162 mion
florin pa 2022, a sera e aña ku un saldo positivo di 31.7 mion florin, mientras ku 2023 a sera ku
un saldo positivo realisá di 30.4 mion florin.
página 12 dje rapòrt “Perspectief en Eigenaarschap”, tambe e komishon ta
indiká ku e défisit presupuestá pa aña 2022 tabata 162 mion florin i Cft riba e
parti aki a mustra riba e oumento dje “license-fee” den e asuntu di Giro ku no tabata den e
presupuesto. Sinembargo, Cft ta enfatisá riba e resultadonan optené dor di a hisa e “compliance”
riba plakanan di impuesto.
Pero sin ku a implementá e oumento dje “license-fee” ku 0,5% minister Silvania tabata sa di sera
e aña ku un surplus di 31,7 mion florin.
Di akuerdo ku parlamentario pa frakshon di MFK, Ramón Yung, partido MIN enbes di sikiera
pensa di ki forma nan por aportá den desaroyo di nos país, sin mas ke purba brua i tira santu den
wowo di pueblo i asina tapa e fayonan kometé atrabes di añanan, bendiendo pueblo un mata tur
na anglo, sin ni sikiera un flor.
