UNOCA tambe ta un di e partnernan hunto cu Biblioteca Nacional y Archivo Nacional den e proyecto pa digitalisa informacionnan historico di Aruba. Directora di UNOCA Sra. Ray-anne Hernandez ta indica cu ta hopi orguyoso di ‘Internet Archive Hero Award’ cu a keda duna na plataforma coleccion Aruba.
Na momento cu UNOCA a keda acerca na 2022 pa Archivo Nacional y Biblioteca Nacional tabata mas pa un rol pa facilita cierto procesonan pa por yega na un website colectivo pa duna informacion digital na un manera mas facil.
Na momento cu a sinta hunto a delibera y a wak e potencial di colaboracion di tres instancia grandi cultural na Aruba a pensa cu si haci e proyecto entre tres y asina por a invita mas institucionnan pa bira parther pa haci e activo mas grandi unda cu por haya diferente informacionnan di Aruba. Importante ta cu ta ricibi mas tanto patrimonionan nacional y asina conhunto ta haci e materialnan aki accesibel pa comunidad di Aruba pero pa esunnan cu ta biba internacionalmente tambe.
UNOCA mes tin coleccion di arte cu poco poco tambe lo agrega e parti aki riba e plataforma di coleccion.aw, pero banda di esaki UNOCA como organisacion cu ta financia of co financia proyectonan cultural ta pone cu UNOCA ta hopi envolvi den cualkier proyecto cu ta yuda stimula crecemento cultural y e educacion cultural. Na momento cu tin e informacion di historia cultural un caminda cu ta accesibel e ta tambe un parti di tarea di UNOCA pa comunidad di Aruba. E mucha, hoben studiante of e adulto cu ta busca informacion o lo mester busca informacion apart mas , pero riba coleccion Aruba por haya tur informacion pa por uza pa cualkier proyecto.
