Den e ultimo 7 añanan, Partido MEP tabata den Gobierno, bou di e liderzago di lider di partido Evelyn Wever-Croes. Un lider capas y bon studia cu a sa di goberna Aruba na un manera transparente y cu un vision cla. Durante e añanan di gobernacion, Gobierno a enfrenta hopi reto, incluyendo e pandemia global cu a toca na porta di henter mundo. Pero partido MEP a sa di demostra su capacidad, curashi y curason pa guia e pais aki den e miho direccion.
Despues di pandemia, Aruba tabata den un situacion critico, pero cu hopi determinacion y trabou duro, partido MEP a sa di stabilisa e pais y crea espacio financiero pa yuda esnan den mas necesidad. Aworaki, apenas 4 aña despues a logra stabilisa e pais y crea espacio financiero, den e periodo nos dilanti lo enfoca riba 7 punto di prioridad.
Punto number 7: Desaroyo sostenibel di balor halto y impacto abou
Un di e factornan cu tin hopi hende den comunidad molestia ta echo di mas hotel. Esaki sigur ta un punto valido mirando cu no tin espacio pa crea mas hotel. Hopi ta esnan cu ta labora na e hotelnan ganando un salaris halto, pero Aruba ta contento cu loke tin, y no lo desea mas.
Ta importante pa menciona cu Gobierno di Aruba ya a tuma e decision cu no ta bay construi mas hotel, y no ta duna mas permiso nitereno pa hotel. E hotelnan cu ta den construccion tin nan permiso y nan tereno di hopi tempo pasa.
Na 2017, ora MEP a drenta Gobierno, a topa cu un situacion na unda cu e Gobierno anterior di AVP a priminti un cantidad di hende camber di hotel nobo. Promesanan riba papel y actonan notarial pa un total d mi 8 mil camber. Mirando cu Aruba no por carga e cantidad aki, y cumpliendo cu un mocion di Parlamento pidiendo Gobierno pa bay renegocia e cambernan aki, MEP a lora manga y a cuminsa cu e proceso. Gobierno a renegocia e total di cambernan unda tabata por y kita e tereno di esnan cu a wordo prometi, si e promesa no tabata solido of dentro di margen di ley. Despues di negociacionnan largo y intenso, y varios caso den corte, a logra baha e cantidad di camber di 8 mil pa 1200, y a pone cu no ta duna permiso pa mas hotel.
Gobierno di MEP ta kere cu desaroyo di un pais mester bay den balansa di desaroyo y conservacion di naturalesa. Pasobra e pida baranca aki ta presta di nos futuro generacion y mester protehe pa asina nan por biba bon aki riba.
Un 59% di Aruba ta areanan protehi pa ley, y no por mishi cu nan. E enfoke aworaki ta pa tin mas control riba mantencion di e areanan aki. E preocupacion di comunidad pa cu e beachnan no ta keda of no ta suficiente pa publico mas ta bay wordo atendi.
Tambe lo bay traha riba un area special pa turistanan crucero tambe por goza di nos lama, evitando asina demasiado hende riba por ehempel Eagle Beach. Esaki ta e desaroyo cu partido MEP ta trahando riba dje aworaki pa frena e construccion di mas hotel, mantene e areanan protehi pa nos futuro generacion, ymantene un balansa entre naturalesa y desaroyo.
