‘Alabes, resumen di resultado di “Local Sentiment” comparti na final di september’
Na final di september 2024, Aruba Tourism Authority (A.T.A.) a comparti resultado di encuesta di “Local
Sentiment”. E resultado di e encuesta ta mustra cu 68% di e participantenan ta reconoce cu turismo ta un
motor clave pa e economía, y entre esnan cu ta traha directamente den hospitalidad, 75% ta satisfecho cu
e industria. Un 68% a duna un calificación positivo, cu un promedio di 3.9 riba un escala di 1 pa 5.
Sinembargo, 32% a expresa preocupacionan, principalmente riba e volumen di turista, e acceso na
vivienda pagabel, e presion riba infrastructura, e distribucion desigual di e beneficionan económico, y e
impacto ambiental. E encuesta a incluyi un variedad generacional, cu un participacion significativo di
Millennials (35%) y Gen X (35%), unda 82% tabata emplea na e momento di responde, 70% tabata den e
rango di 28 pa 59 aña, y 47% tabatin un educacion superior.
A.T.A. a bin ta tuma pasonan proactivo pa redefini e modelo di turismo y pone mas enfoke riba
“Responsible Tourism” y finalmente “Regenerative Tourism”. Accionnan lo dirigi nan mes riba esaki cu
aspiracion pa Aruba avansa y posiciona su mes como lider den practica di turismo responsabel y
sostenibel pa generacionan cu ta sigui. Varios cambio a wordo comparti recientemente y lo sigui haci
esfuerso pa sigui comparti esakinan.
Ta di menciona cu A.T.A. ta orguyoso di e impulso significante pa medio di e sector di turismo. Aruba ta
continua di ta un di e mihor destinacionnan den region di Caribe cu un demanda y posicionamento halto.
Aunke cu esaki ta e caso, ta di reconoce cu nos destinacion ta na un crusada. Ta importante pa reconoce
un cambio di sentimento di turismo mundialmente. E impacto negativo excesivo di turismo riba e
comunidad anfitrion y ambiente natural ta real, y na Aruba nos no ta immuun na e ola di sentimento
mundial aki.
A.T.A. lo keda pone enfasis pa mehora y mantene esfuerzonan pa logra e balans menciona segun e
modelo di High Value-Low Impact cu ta consisti di cuater pilar; ‘Calidad di Bida di e Residente’, ‘Calidad di
Experiencia di e Bishitante’, ‘Proteccion y Preservacion di Naturalesa & Medio Ambiente’, y ‘Contribucion
Economico na nos isla’. Lo enfoca na atrae e bishitante cu lo inverti mas, pero alabes e bishitante cu ta
mas consciente y ta balora y proteha nos cultura, naturalesa, tera, awa, nos hende, y nos economia.
ESTADISTICA CONFORME ACTUALISACION DEN E INDUSTRIA DI TURISMO:
VOLUMEN (“STAYOVER”) CU RESULTADO POSITIVO ADICIONAL DI 16.4% DEN SEPTEMBER 2024
COMPARA CU SEPTEMBER 2023
Conforme e demanda por bai mira tambe cu e aerolineanan lo sigui expande capacidad y asina
permitiendo nos captura e demanda. Den september 2024, Aruba a ricibi un total di 98,285 huesped
“stayover”, esaki ta un crecemento di 5.7%, si compara cu september 2023, unda a ricibi 90,161 huesped
“stayover”.
MERCADONAN Y CATEGORIANAN DI ACOMODACION
Den september 2024, 75.2% di e total di e huespednan “stayover” pa Aruba a bishita for di Norte America,
6.1% a bishita for di Europa, 15.9% a bishita for di Latino America y 2.8% tawata procedente di otro
partinan di mundo.
Mirando e categorianan di acomodacion, den september 2024 24% di huesped a keda den hotelnan
European Plan, 18.4% a keda den hotelnan All-Inclusive, 26.7% a keda den Timeshare, y 30.9% a keda
den otro tipo di acomodacion, conoci tambe como short-term vacation rentals.
SHORT-TERM VACATION RENTALS (STVR)
A.T.A. tin acceso na un plataforma unda por wak e cantidad di cas, apartamento y villas cu ta wordo uza
como vacation rentals como tambe e prijs averahe pa anochi, e ocupacion y un calculacion di e entrada cu
esakinan ta genera. Den 2023, segun un estudio, A.T.A. a logra actualisa inventario di Condominiums
existente y condominiums cu actualmente ta na caminda pa realisacion, y lista actualisa di lugar di estadia
cu no ta un hotel pero cu si ta disponibel na e turista cu ta keda na Aruba pa un corto tempo.
Si compara september 2024 cu september 2023 por wak cu e ocupacion averahe di e acomodacionnan
aki a subi cu 4.1 punto di porcentahe, for di un averahe di 42.7% na september 2023 pa un averahe di
46.8% na september 2024.
Den caso di entrada, si compara september 2023 cu september 2024 por wak cu e categoria ta conta cu
un disminuicion den entrada di -1.5%.
2024 (Year to Date)
Te cu september 2024, Aruba a ricibi un total di 1,082,471 huesped “stayover”, esaki ta un crecemento di
16.4% compara te cu september 2023, unda a ricibi 930,157 huesped “stayover”. Ora ta yega na lider den
mercado, te cu september 2024, 80.2% di e huespednan ta di Norte America, 4.7% ta di Europa, 12.6% ta
di Latino America, y 2.5% tawata procedente di otro partinan di mundo.
Bishita www.ata.aw tur luna pa A.T.A. ‘Statistical Monthly Report’.
