Pasobra Mi sa e plannan cu Mi tin pa boso, plannan pa pas,y no pa calamidad,pa duna boso un futuro
y un speransa. Anto boso lo sclama na Mi y bin haci oracion, na Mi y lo Mi scucha boso. Y boso lo
busca Mi, y boso lo haña Mi ora boso busca Mi di henter boso curason. ( Jeremias 29:11-13).
No laga bo curason envidia pecador,ma biba semper den e temor di Señor. Siguramente tin un futuro,
y bo speransa lo no wordo corta kita afo.(Proverbionan 23:17-18).
Tin hopi hende mester di un speransa den nan bida, pasobra nan ta bay cu e zwaai di mundo, den cual
hopi ta pretende, papia di plannan, pero no ta respeta Dios cu tin e futuro den Su man.
Den tur nos plannan nos mester inclui Dios, sino e plan lo ta sin contenido, ora nos kier haci cos riba
nos mes sin corda riba e boluntad di Dios, e spirito di materialismo ta lanta den nos, y nos ta cuminsa
pensa cu nos mes ta mas importante cu tur cos.
Pega na Dios , nos por tur cos, separa di Dios nos no por nada ( Juan 15:5).
Prome cu tur cos nos tin di corda cu e boluntad di Dios mester bini na prome lugar.
Pesey e palabra di Dios ta bisa;No sea conforme e mundo aki,ma sea transforma pa medio di e
renobamento di boso mente,pa boso por comproba,kico ta e bon y agradabel y perfecto boluntad di
Dios.( Romanos 12:2).
Y cu tur cos ta obra pa bon,pa esnan cu ta stima Dios,pa esnan cu ta yama segun Su proposito.
Esnan cu ta stima Dios tin cu busca pa cumpli cu e boluntad di Dios y cu ayudo di Dios cana den Su
caminda.
Dios na tur momento ta cu nos, Salmista David a bisa; Maske mi cana den vaye di sombra di morto,
mi no tin miedo di maldad, pasobra abo ta cu mi. Bo bara y bo garoti ta consolami.( Salmo 23:4).
Encomenda bo caminda na Señor confia den dj’E y E lo hacie , e E lo laga bo husticia briya manera
lus, y bo derechi manera merdia.( Salmo 37:4).
Nos confiansa den Dios, mester aumenta tur dia, pasobra no tin otro opcion, esnan cu ta confia den
Señor lo ta sigur den tempo dificil.
Pasobra ta para scibri den 1 Thesalonisensenan 4:15-18 cu Señor lo bin busca su pueblo, y tin para
scirbi cu e mortonan den Cristo lo lanta prome.
E dia y e ora ningun hende no sa, pero e señalnan di cual Hesus a papia den Mateo 24. Nos ta mira ta
cumpliendo cada dia.
Mas ainda e cambio den karakter di hende di cual Pablo a scirbi den 2 Timoteo 3:1-5, ta bisto awor pa
nos tur,cu nos ta bibando den tempo trabahoso, caminda hende a perde respet y temor di Dios.
Si nos corda riba e historia di e dies virgennan , nos tin cu compronde cu tur tabata sa di e binida di e
bruidegom, pero ora e bruidegom a yega , ta cinco so tabata prepara pa bay cune.
Pesey nos no por biba un bida con cu ta, manera e mundo ta haci, pa ora Señor bini e no haña nos mal
pega den paranda, buracheria y preocupacion di bida.( Lucas 21:34)
Awor cu e Dios di pas santifica boso completamente,y cu boso spirito .curpa y alma sea preserva sin
culpa na e binida di nos Señor Hesus Cristo.( 1 Thesalonisensenan 5:23).
Laga nos prepara pa Su binida.
Sinceramente, Pastor Marcel Balootje.