Den e último añanan e krísis polítiko i ekonómiko
severo na Venezuela a krea un migrashon masivo di siudadanonan ku ta
buskando mihó kondishonnan di bida relashoná ku e kolapso sosial di e pais. Tin
indikashon sinembargo ku un fenómeno diferente por ta tumando lugá
resientemente: e posibel migrashon di hende ku vínkulo ku e gobièrnu di Nicolás
Maduro, mihó konosí komo ‘enchufados’, pa e islanan ABC (Aruba, Boneiru i
Kòrsou). A keda opservá ku algun di e individuonan akí, ku tin konekshon ku e
esferanan haltu di chavismo, a usa avion privá òf yate luhoso pa biaha pa e
destinashonnan atraktivo akí den Karibe. Tin sospecho ku no ta trata akí di
simplemente un forma di turismo, sino ku e bishitanan tabata relashoná ku
kompra di biennan luhoso, aktividatnan den kasino i inkluso posiblemente
kompra di propiedat. Esakinan ta akshonnan ku por a keda finansiá ku fondo di
orígen dudoso.
Refugio pa fondonan di orígen ilísito
E islanan ABC, ku ta kai bou di hurisdikshon di Reino Hulandes, ta destinashonnan
turístiko konosí pa nan naturalesa bunita i nan trankilidat. Sinembargo, último tempu e
islanan akí ta atraé atenshon di un klase nobo di bishitante: hendenan ku pa motibu di e
sanshonnan ku Merka i Union Oropeo a imponé, ta buska destinashonnan alternativo
kaminda nan por sigui gosa di nan fortuna, liber di e restrikshon finansiero i legal ku nan
ta enfrentá den otro parti di mundu. Ta konosí ku algun di e figuranan ku por keda
vinkulá ku e régimen venezolano a bira suheto di sanshon ku ta limitá nan entrada na
paisnan na Oropa i Merka. Den e konteksto akí, no ta nada straño ku nan por konsiderá
e islanan ABC komo un opshon pa sigui biba nan estilo di bida abundante i di luho.
Aunke ainda no tin prueba konkreto ku ta indiká un migrashon signifikante di e grupito
akí pa e islanan, e bishitanan ku nan a hasi den pasado ta krea preokupashon. Ta
esensial ku outoridatnan lokal di islanan ABC, huntu ku komunidat internashonal, ta
keda alerta i mantené un supervishon aktivo, pa garantisá ku e teritorionan akí no ta
bira un refugio pa fondonan di orígen ilísito. E rikesa akí, si por komprobá ku su orígen
ta ilegal, no ta pertenesé na e grupo akí, pues ‘enchufadonan’ ku ta us'é, sino na e
pueblo venesolano ku ta sufri e konsekuensianan di un krísis humanitario devastador.
Supervishon efektivo
E posibel traslado di e figuranan ku vínkulo ku e régimen di Maduro pa e islanan ABC ta
un tema ku no mester keda tratá superfisialmente. Aunke kada persona tin derecho pa
gosa di fruta di nan trabou na un manera legítimo, no por ta aseptabel ku e
enchufadonan akí ku a logra nan fortuna atraves di praktikanan korupto òf retiro for di
fondo públiko, por sigui disfrutá di e sèn akí na kualke otro lugá, sin tene kuenta ku e
situashon severo ku Venezuela ta pasando aden. Lo ta rekomendabel pa fortifiká e
mekanismonan di koperashon entre e islanan ABC i órganonan internashonal pa
monitoreá e transakshonnan finansiero i di kompra di biennan luhoso ku por ta
relashoná ku hende ku a keda sanshoná òf investigá pa korupshon. Solamente ku
supervishon efektivo i akshon kordiná lo por prevení ku e islanan ABC por bira un
refugio pa fondo di orígen ilísito.
Hustisia mester prevalesé
E posibel migrashon di individuonan yegá na e régimen venezolano pa e islanan ABC
mester ta un motibu di alerta i akshon preventivo. E pueblo venezolano meresé
hustisia, i esaki ta nifiká ku esunnan ku a probechá di nan posishon di poder pa
enrikesé nan mes, no por sigui disfrutá di e fondonan akí sin haña kastigu, sin enfrentá
e konsekuensianan di nan akshonnan. E islanan ABC ta i tin ku keda un lugá kaminda
tin lei ta keda respetá i kaminda tin prinsipionan étiko, evitando asina ku nan por bira un
santuario pa impunidat. Komunidat internashonal tin e responsabilidat di garantisá ku
hustisia ta prevalesé, i defendé esnan ku a bira víktima di korupshon i abuso di poder.