Testnan y informacion valioso di profesionalnan di Hospital
Diadomingo a tuma luga Expo Salud edicion 2024 unda a pone e biaha aki como tema
Obesidad. Diferente fundacion y companianan tabata presente cu enfoke primordial pa
conscientisa comunidad di Aruba tocante e tema di obesidad y alabes brinda oportunidad pa
haci diferente test, haci pregunta y comparti informacion tocante e topico aki. Horacio Oduber
Hospital como parti di e team di Plataforma Promocion di Salud claro tambe tabat’ey hunto cu
su profesionalnan pa forma parti di e exitoso Expo Salud aki.
Presidente di Hunta di Directiva Jacco Vroegop a expresa cu “Hospital semper t’ey pa
comunidad y sin falta nos t’ey atrobe e aña aki na Expo Salud pa duna informacion y alabes
duna bishitantenan oportunidad pa haci diferente test ne booth di HOH.”
HOH su team di rehabilitacion, specificamente fisioterapista tabata presente unda a haci test
di condicion fisico, test di forsa y tambe a midi e porcentahe di vet den curpa. Palabra di
gratitud ta bay na e gym di Cuts ‘n Curves cu a yuda team di HOH cu’n treadmill pa asina haci
e test di condicion fisico posibel. Tambe tabat’ey nos dietistanan cu informacion tocante e uzo
di salo den alimentacion. Salo hopi biaha ta un ingrediente cu facilmente no ta para keto riba
dje y facil pa consumi hopi mas di dje cu e cantidad normal cu ta recomenda.
Tambe por a topa na e booth di Hospital coleganan di poli bariatrie cu a duna informacion
tocante e proceso bariatrico cu sigur semper tin hopi pregunta. Representantenan di
departamento LABHOH tabata t’ey pa mustra con un pida di vet di curpa ta mustra y tambe
bou microscop diferente celnan di sanger relaciona cu vet. Alabes a duna informacion riba e
testnan mas comun cu ta haci pa check vet den sanger, tambe ki tipo di test ta haci pa e
diferente organo den curpa y con pa interpreta esakinan. Y no por falta e presencia di
Bloedbank mirando cu ta tuma tur oportunidad pa recluta mas donante pa join e team di
donante di sanger. Aruba ainda falta hopi donante di sanger, pues si ainda ta duda of toch kier
registra, por subi www.bloedbankaruba.aw pa mas informacion.
HOH ta contento cu e tipo di actividadnan asina pasobra e ta un manera di trece tur e
stakeholders hunto pa un solo meta, esta educa, conseha y brinda nos comunidad cu hopi
informacion valioso tocante salud medico y salud en general.
Hospital ta contento di a forma parti di Expo Salud 2024 cu tabata un exito rotundo mirando e
acogida nunca mira den exponan anterior. Y tambe ta manda palabra di pabien y gratitud pa
henter e team di HOH cu a traha duro pa haci e booth di HOH posibel y exitoso.
