Ta ku hopi asombro miembro di Parlamento pa Frakshon di MFK, Ramón
Yung, a Tuma nota di ekspreshonnan hasí pa líder di PAR, sr. Quincy Girigorie. Según e líder di
PAR, e aktual gobierno a hiba nos país den un situashon penoso, pasobra pueblo a skohe pa
lidernan ku no tin formashon, ku no tin konosementu i ku no ta lesa dokumento, mientras ku
parlamentarionan tampoko no sa nan trabou.
Parlamentario pa Frakshon di MFK, Ramón Yung ta kere ku lider di PAR, Quincy Gririgorie, sea
a kuminsa sufri di demensia òf e ta humando kos lorá den saku di semènt, poniendo ku e ta
halusiná. Pasó ta imposibel ku hustamente Gabinete Rhuggenaath, kual gabinete e mes tabata
forma parti di dje i ku a hiba e país aki den dekadensia, awe ta tribi di bisa ku e aktual gabinete a
hiba país Kòrsou den un situashon penoso.
Ta bon pa refreská memoria di Quincy Girigorie, ku ta su èks lider, Eugenne Rhuggenaath,
despues di a hiba un maneho finansiero desastroso huntu ku MAN i PIN i ku a pone Finansa di
país den un situashon di krisis, el a yega asina leu i kai den un desesperashon i bisa ku pueblo a
haña e fortalesa den su mes i sa ku e mester bai kome aros ku webu.
Quincy Girigorie a lubidá ku dia sindikalistanan a bai manifestá na Fòrti, ta su persona mes komo
Minister di Hustisia a duna instrukshon na polisnan pa aktua ku man fuerte i lansa gas
lagrimógeno riba e manifestantenan. Quincy Girigorie a kaso a lubidá dikon awe e tin e apodo di
“KILOgorie”?
Si Quincy Girigorie ta pretendé ku e gabinete Rhuggenaath kual e tabata forma parti di dje tabata
un gabinete di intelektualnan ku kapasidat, dikon nan no tabatin e konosementu i kapasidat
sufisiente pa por a kobra tur e 4.2 milyar florin na impuesto ku tabatin riba kaya.
Ku tabata trata di un gabinete di intelektual i ku kapasidat, dikon ora a entregá e Ontwerp
Begroting pa aña 2021, den e “presupuesto di mas aña” tabatin un défisit di 220 mion pa aña
2022? Si tabata asina fásil pa kobra e plakanan di impuesto riba kaya, anto e 220 mion di déficit
riba e presupuesto di 2022 lo mester tabata “peanuts”.
Pasó, ku e aktual gabinete kual na opinion di Quincy Girigorie no tin formashon i no tin e
konosementu i kapasidat pa goberná, ta kon por ta posibel ku despues di 2021 e aktual gabinete
aki no a sigui fia plaka serka Ulanda.
Ku e aktual gabiente no tin e kapasidat i konosementu, ta kon por a kobra mas tantu na plaka di
impuesto, te ku añanan 2022 i 2023 por a sera ku un saldo positivo i tur kos ta indiká ku 2024
tambe lo sera ku un saldo positivo?
Kon por ta posibel ku e gabinete aki por a logra asfaltá tantu karetera na Kòrsou, mientras bou di
gabinete Rhuggenaath nunka tabatin plaka pa hasi esaki?
Gabinete Pisas 2 a kumpra e ambulansnan ku Gabinete Rhuggenaath a kue e
plaka pa por a kore kampaña kuné. Gabinete Pisas 2 a kumpra brantwer i
ekiponan ku Servisio di Brantwer pa basta tempu kaba tabata sklama pa nan.
Gabinete Pisas 2 a duna Selikor sostén finansiero pa por a kumpra ekiponan i trùknan di sushi
nobo.
Gabinete Pisas 2 a duna diferente “tranche” di plaka na CMC, mientras ta atendiendo pa yega na
un solushon strukturá pa e problemanan finansiero di CMC.
Gabinete Pisas 2 a inbertí miones den drechamentu di diferente fasilidat deportivo, mientras bou
di Gabinete Rhuggenaath no por a kaba ku e sentro multi funshonal na Barber, pasó tabatin un
chèk di un suma di algún shen mil florin ku a somentá. Quincy Gririgorie komo Eks minister di
hustisia tambe tabata enbolbí den realisashon dje “gesloten inrichting” na JJIC na Groot Kwartier
ku Ulanda a finanshá, pero ku NUNKA NO a terminá, pasó te dia di awe NO por responsabilisá
uso dje fondonan aki.
Quincy Girigorie talbes a lubidá kon klientenan di SDKK tabata sklama pa e kuminda malu ku
“friends & family” tabata sirbi nan den SDKK. Gabinete Pisas 2 sinembargo a inbertí den
renobashon di e kushina i awor klientenan mes ta prepará nan propio kuminda i di mihó kalidat
di lokual nan tabata haña bou di maneho di eks minister Quincy Girigorie.
Naturalmente tin hopi mas ku lo por rekapitulá pa refreská memoria di Quincy Girigorie, pero
teniendo kuenta ku su posibel deterioro mental, sea kual sea e kousa, nos ta mantené t’e aki
p’asina no kousa mas preshon riba su estado di memoria.
Danki di antemano pa dediká atenshon na contenido di e komunikado aki den bo(so) siguiente
edishon di notisia.
