Fraccion di MEP den Parlamento tambe ta haya e
pregunta aki for di pueblo. Politicamente no ta usual cu un minister cu ta bandona su partido
den coalicion ta keda forma parti di ministerraad. Minister Independiente un otro novum di
Partido no tradicional Raiz. Aki ta hiba bo na comprende cuanto bruhamento Raiz-no
tradicional a trece den final di e gobernacion aki. Kisas ta un opcion pa minister Geoffrey
Wever finalisa su termino como minister demisionario te cu entregamento di lista, algun ta
pensa y otronan ta bisa te ora cu pueblo scoge e proximo gabinete.
Lider di Fraccion di MEP, Hendrik Tevreden a indica cu Wever ta un bon tercio, pero
e filosofia no tradicional ta uno bastante bruha. Wever como minister ta tin dificultadnan pa a
logra su metanan cu e a propone. Basta tempran e a ripara cu goberna di un filosofia di ‘buki’
no ta trece resultado positivo. Seramento di Dump ad hoc, separa e departamento di nos
Grandinan, pa minister Ursell, y perde RWZI pa otro minister ora cu no por a concretisa un
solucion ta e minimo pa menciona. Sinembargo loke Raiz – no tradicional a logra ta pa crea
duda den partidonan sin experiencia y base di historia di gobernacion. Kisas por laga Wever
atende su cartera ainda te cu entrega di lista pasobra gobierno no tin mester di mas caos, o pa
duna Ursell su cartera. Fraccion di MEP ta sostene pa e continua y evita awor un Ursell bruha
mas cos. Echo ta keda cu ta na su partido Raiz pa duna opinion si nan ta sostene.
E fraccion ta enfatisa cu, a pesar cu no tur ora MEP tabata di acuerdo cu Wever,
semper e actua na un manera profesional si, y por a comunica bon cu ne. Y profesionalmente
ta haya cu e intencion pa controla interes di tiendanan cu ta duna fiansa atraves di AFTA ta
algo positivo cu e a implementa ", Tevreden a expresa. Gabinete Wever-Croes II kier pa
pueblo por beneficia di un mihor interes pa ora ciudadanonan ta scoge pa un fiansa den
tiendanan y no kier pa interesnan halto sigui. Nos tin di evita cu interesnan abusivo y
demasiado halto ta sigui wordo usa ora di duna fiansa na ciudadanonan
Partido RAIZ – no tradicional, awor na filigrana
Un otro factor politico ta keda si cu pa Partido RAIZ no tradicional, e salida di
Geoffrey Wever ta un golpi politico duro. Wever den gobernacion, tawata wordo mira como
nan mihor minister. Pa hopi, e Partido RAIZ no tradicional, lo no recupera despues di e salida
di Wever, y e futuro di e partido ta wordo poni den duda pa mantene asiento den e proximo
eleccion.
Un aspecto clave di e tension entre Wever y su ex partido ta cu nan palabracionnan no
tawata solido. Parce cu Wever no tur ora tabata di acuerdo cu e decisionnan cu su ex Partido
ta tuma contra MEP y siguramente esaki lo a contribui na e desaroyo di e friccion. No tabatin
otro solucion cu pa Wever retira y laga Raiz -no tradicional na filigrana.
A pesar di tur esaki, fraccion di MEP ta expresa su deseo di exito pa Geoffrey Wever
den futuro. Nan ta dese'e suerte cu e retonan su dilanti y su escogencia. Sinembargo ta
importante pa pueblo realisa cu tur e tendencianan aki no tradicional, solamente a causa
bruhamento, y destruccion. Ta na comunidad awor pa scoge cu si nan ta continua na duna e
ideologianan aki sosten, o si ta duna oportunidad na esnan cu respeta nos tradicion pero cu e
boluntad pa haci cosnan mihor y den un manera inovativo den politica.