STINAPA ta hasiendo tur esfuerso pa sigui buska e rèptil ku nan a señalá den
e área rònt di Sorobon Beach. Pa garantisá siguridat di tantu habitantenan komo
bishitantenan, e sitionan akí ta keda será te próksimo aviso. Den esaki ta estriktamente
prohibí pa drenta laman. Siguridat di tur hende ta na promé lugá i no ta balotá esaki.
Akshon di búskeda ku teknologia avansá
Pa lokalisá e rèptil den un forma mas rápido i mas seif posibel, STINAPA a tuma vários
medida. Den zonanan stratégiko nan a pone kámara ‘trap’, e kámaranan akí ta saka
potrèt i filma ora ku nan detektá moveshon i banda di esaki nan ta hasi uso di drone pa for
di den altura ofresé un bista adishonal riba sitionan ku ta difísil pa alkansá. E enfoke di e
esfuersonan akí ta riba lokalisá e rèptil i kaptur’é bibu.
Siguridat ta keda e mayor prioridat
Siguridat en general di habitantenan i empleadonan di STINAPA tin e mayor prioridat.
STINAPA ta traha estrechamente huntu ku entidat públiko Boneiru pa limitá e riesgonan te
na un mínimo. Ta responsabilidat di entidat públiko Boneiru pa garantisá siguridat di tur
hende enbolbí.
Konsulta ku empresarionan afektá pa un reapertura kontrolá
STINAPA i entidat públiko Boneiru a hiba kòmbersashon ku e empresarionan ku a keda
afektá na momentu ku a sera Sorobon Beach i Lac Cai. Konhuntamente nan ta buskando
solushon pa den un forma seif i mas rápido posibel habri e áreanan akí bèk, sea ku ta
parsialmente òf kompletamente. Esaki ta sosodé solamente ora e sirkunstansianan ta
pèrmití esaki i ora por garantisá siguridat.
Evitá e áreanan será
Un yamada urgente na tur habitante i bishitante di Boneiru: Respetá e echo ku Sorobon
Beach i Lac Bai ta será i no drenta den e áreanan akí. Ta di krusial importansia pa kumpli
ku e yamada akí pa garantisá siguridat di tur hende i pa mas rápido posibel logra un final
eksitoso di e búskeda pa e rèptil akí. Huntu nos por sòru ku e situashon akí ta keda seif i
manehabel.
