Stephany Sevinger cla prepara pa politica y pa e causa. Den un ambiente di famia y esunnan mas keri den bario di rancho Stephany Sevinger a keda lansa como politico. Manera a ser bisa politica no ta facil, politica ta duro, mas bon kier traha pa bo pueblo mas e contrincantenan ta trata di ponebo abou, pero nos t’ey nos no ta dobla, asina Benny Sevinger a duna di conoce na e speech di introduccion di su yiu muhe Stephany Sevinger.
Un anochi yena cu personanan positivo cu berdaderamente kier mira un cambio den gobernacion y tin e fe cu Stephany Sevinger ta e cambio e luz cu por trece cambio den e politica na Aruba. E lucha pa bo comunidad hamas lo bo para, 24 aña pasa su tata a keda introduci pa Watty Vos na e mes un sitio cu awe su yiu muhe ta keda introduci den politica despues di 24 aña den e dushi pueblo di Rancho, playa pabou.
Stephany for di 4 aña ta den e ambiente politico hunto cu su tata, for di un edad jong a participa y dedica duna un parti di dje duna programanan social na nos grandi nan, enfermonan, handicapnan y ora e ta bin cas e ta comparti e storianan y semper tabatin e anhelo pa yuda y duna na nos grandi nan y nos muchanan.
Cu Stephany Sevinger riba lista di AVP e sosten na AVP ta grandi y no mester tin ningun duda cu e proximo gobierno cu partido AVP ta den gobierno. Partido AVP ta un partido di tradicion un instituto cu di tempo di Henny Eman a bringa pa Pais Aruba unda cu a desaroya Aruba y ta haci cu AVP tin un trayectorio, pesey mes AVP tin institutonan pa dirigi e futuro lidernan pa nan ta futuro lider di mañan. AVP ta un partido un instituto cu ta percura pa e lidernan di mañan por percura pa e futuro di nos yiunan, nos nietonan di e futuro generacionnan.
Stephany un dama cu curashi cu kier hiba Aruba padilanti. Stephany Sevinger a keda inspira den politica danki na e logronan cu partido AVP tin y drenta den e mundo di politica. Despues di a hiba un lucha hopi importante ultimo pa cu husticia.
Cu su 17 aña di edad e la haci trabou boluntario como clown dokter y aki por a mira e negligencia pa esunnan den hospital, salud mental y esunnan cu un descapasita fisico, pero principalmente kico nos grandi nan ta pasa aden.
E scenarionan aki a pone su persona a lora manga y tuma e decision y traha pa su comunidad. Mirando e desaroyo aki Stephany a dicidi di bay studia na “Miami Dade College Associate” unda cu a ricibi su Associate Degree y a logra gradua cu e honor di mas halto y por a representa su Universidad te na China. Tambe Stephany a studia na “Florida International University” na Merca unda cu a haya su Bachelors in International Relations & Political Science.
Stephany Sevinger ta un profesional riba su mes y tin su habilidad pa traha den team como project management, time Management,Public Relations,Negotiation,Teamwork,leadership,Effective Comunication,Traning & Development.
Despues di esaki a bay bek Hulanda y por a drenta den e arena politica na Hulanda mes, pero e yamada a keda haci algun siman pasa pa Aruba y a tuma e decision y ta sinti cu esaki ta e momento pa Aruba. Cu tur su experencia y conocemento y tur locual cu scol a ofrece su persona pa e sabiduria politico y liderazgo duna esaki na Aruba, paso Aruba mester di dje , personanan capacita cu sa kico ta politica y kico ta goberna.
Nos mester di hende nan den politica cu ta traha den ekipo y no cu cada un ta lider di partido riba nan mes, pero un partido cu sosten y cu diferente cabesnan ta traha hunto mane un team, un institucion manera AVP pa por logra esaki.
E impotencia cu tin cu Aruba ta bay den decadencia ta refleho cu Aruba mester miho y hunto mester haci esaki, ningun lider no por su so, pero hunto cu Aruba completo lo hiba Pais Aruba padilanti un biaha mas. E filosofia di AVP ta bunita “respeta y balora nos ayera pa cuida nos awe y respeta nos mañan”.
Nos tin cu duna balor na e trabou grandi cu nos pensionadonan a haci, nos grandi nan cu a haci asina hopi trabou duro durante añanan, nan no por mas cu tur e medidanan cu tin. Nos grandi nan ta e personanan cu a laga un fundeshi pa nos Aruba. Nos muchanan ta e futuro maestronan cu lo ta futuro lidernan cu ta e futuro di nos Aruba.
Lamentablemente e futuro di nos muchanan ta mustra hopi scur e gobierno sin vision no ta hibando nos dilanti y nos mester tin un gobierno cu tin un plan y vision unda e ta bay. Aruba mester di un team educa, prepara cu ta hiba Aruba padilanti.
Tambe Stephany a dedica un parti di su speech pa e ciudadanonan Latino cu ta biba na Aruba riba e dia “de la rasa” y ta para keto un rato paso ta un dia pa reflexiona riba e integridad di nos comunidad unda cu culturanan ta uni.
AVP ta un partido cu nunca a cera su portanan pa e comunidad stranhero na Aruba y e biaha aki tampoco no lo haci esaki. Na final Stephany Sevinger ta pidi pa Aruba completo nos tur hunto traha pa por mira un cambio, hunto cu AVP so por hiba Aruba padilanti, cu respet y dignidad, No por ta posibel cu decisionnan ta keda tuma sin cu ta consulta cu e pueblo di Aruba, nos mester trece respet bek pa e pueblo di Aruba na mesa. vota Stephany Sevinger.
