Dia 27 di sèptèmber 2024 Tourism Corporation
Bonaire (TCB) a organisá su di kuater Bonaire Tourism Summit na Plaza Beach &
Dive Resort.
Diputado Clark Abraham a duna un presentashon tokante futuro di turismo na
Boneiru. El a elaborá tokante importansia di e Indikadónan Krítiko di Prestashon
(KPI’s) i el a duna mas informashon tokante ‘airlift’ i turismo krusero. Diputado
Abraham a bisa: “Ta algu tremendo pa mira un asistensia asina grandi di nos
partnernan turístiko na e Kumbre di Turismo djawe. Esaki ta demostra nos
motivashon i dedikashon konhunto pa traha huntu den nos sektor ekonómiko mas
vital. Pa medio di traha huntu nos por alkansá nos metanan i garantisá éksito
duradero.”
Miles Mercera, direktor di TCB, a ilustrá un mapa di ruta ambisioso pa Boneiru su
sektor turístiko durante e Bonaire Tourism Summit di aña 2024. Mercera a pone
énfasis riba sostenibilidat, inklushon lokal i kresementu ekonómiko i a anunsiá un sèt
amplio di akshon i KPI.
Segun un investigashon resien di CBS, Boneiru su PIB (produkto interno bruto) na
aña 2022 a subi ku 8,8% kompará ku e aña anterior i a yega te mas òf ménos $ 662
mion, pa un gran parti komo konsekuensia di un kresementu fuerte di turismo.
Turismo ta kontribuí ku 40% na Boneiru su PIB, loke ta resultá den mas òf ménos $
265 mion, loke ta konfirmá turismo su ròl komo e motor ekonómiko mas importante
di nos isla. Ku e sifranan akí komo bèkgrount, Mercera a pone énfasis riba
importansia di invershon kontinuo den turismo pa sostené su kresementu i pa
mehorá kalidat di bida di nos poblashon lokal.
“Turismo no ta trata di solamente sifra; ta trata tambe di nos hendenan i futuro di nos
isla. Nos mester invertí mas den nos infrastruktura, den empresanan lokal i den
kapital humano pa por keda kompetitivo riba nivel mundial”, segun Mercera durante
e kumbre.
E presentashon di Mercera a enserá diferente KPI ku por midi i ku a keda diseñá pa
garantisá un aserkamentu ekilibrá di turismo, ku tantu nos bishitantenan komo nos
habitantenan ta probechá di dje:
1. Atraé 180.000 bishitante stayover na aña 2024, di kua te ku awor ya kaba nos
por a yama bon biní na 129.678 bishitante.
2. Oumentá loke nos turistanan ta gasta en total ku 5% a base anual lo ta
na benefisio di empresanan, akomodashonnan i servisionan lokal.
Aktualmente bishitantenan merikano ta gasta mas òf ménos $ 300 pa dia,
miéntras ku bishitantenan hulandes ta gasta mas òf ménos $ 160 pa dia.
3. Logra un skor di satisfakshon di bishitante di 9, ku un enfoke riba kalidat
di servisio, limpiesa i eksperensia en general, ku aktualmente ta pará na 9.
4. Mantené e kantidat di bishitante ku ta bini bèk riba 50%, ku un
probabilidat di un skor di bishita ku ta ripití di por lo ménos 8. Aktualmente
mas ku 50% di e bishitantenan ta bini bèk i e probabilidat pa bini bèk ta skor
9.
5. Sostené sinku empresario hóben pa kuminsá un empresa relatá na turismo
i promové inklushon ekonómiko lokal.
6. Fasilitá formashon di 10 studiante boneriano den turismo na nivel di MBO,
HBO òf universitario pa fortifiká talentonan lokal.
7. Anualmente krea 12 evento komunitario, ku énfasis riba patrimonio kultural
i enbolbimentu lokal.
8. Ehekutá tres proyekto pa konservashon kultural pa aña, ku komo meta pa
laga turismo kultural krese di 1% pa 3% di e kantidat total di bishitante.
9. Maksimalisá esfuersonan di merkadeo pa konbertí e alkanse den
reservashonnan real via plataformanan digital i tradishonal.
Mercera a pone énfasis tambe riba e ‘return on investment’ (ROI) konsiderabel ku
turismo ta generá pa Boneiru. “Pa kada $ 1 ku nos invertí den turismo, nos isla ta
mira un rendimentu di mas òf ménos $ 132,50 na gastamentu direkto,” segun
Mercera. El a boga pa un oumento di e invershon aktual anual den turismo di $ 2
mion pa $ 4,5 mion. Si nos realisá e invershon akí, Boneiru su PIB por krese i segun
kalkulashon yega $ 701,55 mion, un subida di 5,97%.
Banda di sifranan ekonómiko Mercera a pone énfasis riba e nesesidat di invershon
stratégiko pa redusí dependensia di nos isla for di merkadonan spesífiko, pa sostené
kompanianan di aviashon nobo i esunnan aktual, sostené kresementu di kamber ku
60%, krea empleo pa nos poblashon lokal i mehorá nos infrastruktura lokal.
“Para ketu no ta un opshon”, asina Mercera a bisa. “Nos ta determiná pa logra
progreso pa medio di amplia rutanan di aviashon, protehá nos medio ambiente mas
mihó, drenta partnerships nobo rònt mundu i sostené kresementu di nos
empresanan lokal pa medio di turismo.”
Komo parti di e STMP 2017 – 2027, e organisashon mester kambia den un
Destination Management and Marketing Organization (DMMO). E kambio akí lo hasi
posibel pa TCB trese promoshon den ekilibrio ku management i desaroyo di
produkto, di manera ku desaroyo di turismo na Boneiru ta na benifisio di nos isla su
ekonomia i su ambiente natural úniko.
Sr Ewald Biemans, doño di Bucuti & Tara Beach Resort Aruba, a papia tokante
aplikashon di ‘best practices’ riba tereno di sostenibilidat. STINAPA a brinda
konosementu di ekoturismo i e ekilibrio entre bishita i konservashon di naturalesa.
Maarten van der Scheer, direktor di Bonaire International Airport, a duna algun
aktualisashon tokante e aeropuerto i desaroyonan nobo di ruta. Corendon a
kompartí informashon tokante su kompania di aviashon i e ruta nobo di buelo ku ta
konektá Boneiru ku Hulanda. Jody Diamond, doño di Diamond Public Relations, a
duna un bista general di e atenshon den medionan di komunikashon den e promé
tres kuartalnan di e aña akí i e espektativanan pa e último kuartal.
Veroesjka de Windt, direktor di BONHATA, a presentá informashon tokante grado di
okupashon, promedio di tarifa di dia i entrada pa kamber disponibel, kaminda el a
kompará aña 2023 ku aña 2024. El a demostrá ku generalmente mirá tabatin un
subida modesto den grado di okupashon na aña 2024. E tarifa di dia promedio di e
aña akí konsekuentemente a surpasá aña 2023, ku un ADR di $ 179 den luna di
sèptèmber 2023 i $ 203 na aña 2024. En general por bisa ku e benta pa kada
kamber disponibel na aña 2024 a mustra un kresementu sólido kompará ku aña
2023. No opstante un oumento leve di okupashon e aña akí, e sektor ta keda
kouteloso tokante e prognóstikonan di tarifa pa e di kuater kuartal, asta awor ku
JetBlue, Corendon i WestJet a subi merkado.
TCB ke gradisí tur partner ku tabata presente e aña akí na e Bonaire Tourism
Summit anual.
