E presidente nobo di Konseho
Sosial Ekonómiko (SER) di Sint Maarten, Señor Harlec Doran, a hasi un bishita di kortesia na
su counterpart na Kòrsou djamars dia promé di òktober último. E bishita aki ta marka un
momento importante pa e organismo konsultivo di Sint Maarten ku resientemente a reanudá su
funshon.
Señor Doran a ser risibí pa drs. Raul Henriquez, direktor i sekretario general di SER Kòrsou, ku
a representá e presidente den funshon, mr. John Jacobs, ku pa motibu di otro kompromisonan
ta den eksterior. E enkuentro aki ta karakterisá su mes komo un paso pa restablesé e relashon
estrecho entre e dos konsehonan konsultivo, ku ta kolaborá for di tempu di Antia Ulandes.
Pa SER di Sint Maarten, e bishita di Doran ta bini despues di un periodo di 16 luna di inaktividat
dje konseho. Debí na un disputa largu ku representantenan di komersio den e órgano a surgi un
retraso den nombramentu di miembronan. SER Sint Maarten, komo órgano klave ku ta duna
konseho riba asuntunan sosioekonómiko na su gobièrnu, a reanudá su aktividatnan na prinsipio
di e aña akí.
Durante e diskushonnan na Willemstad, partidonan a interkambiá punto di bista riba informenan
resién i a eksplorá posibilidat pa un koperashon mas estrecho. Señor Henriquez a enfatisá “E
aliansa aki ta esensial pa e dos paisnan karibense”. “Nos ta konfrontá retonan sosial-ekonómiko
similar, i p’esei koperashon ta nesesario, pa fortalesé nos ròl konsultivo i sirbi nos
komunidatnan mihó.”
Despues di un enkuentro ku SER Aruba na prinsipio di e siman akí, e bishita na Kòrsou a sigui
komo parti di un esfuerso mas amplio pa SER Sint Maarten reafirmá su presensia den
asuntunan konsultivo den region. E partisipashon di Doran ta manda un señal firme ku e
konseho di Sint Maarten ta kla pa reaktivá su ròl kompletu despues di un periodo relativamente
largu di inaktividat.
Presidente di SER Sint Maarten ta hasi bishita di kortesia na SER Kòrsou
