David a bisa; Lo mi halsa mi wowonan na e ceronan for di unda mi yudansa lo bin?
Mi yudansa ta bin for di Señor kende a traha cielo y tera.
Si nos wak bon mundo ta yena cu miedo y angustia kico hende por haci cu hende, e palabra di Dios
tocante guerra y rumor di gera, hamber, pest, malesa , terorismo , enfermedad ta cumpliendo, y mas
cla cu nunca nos tur por mira locual ta sosode.
Ken por a imagina su mes awendia bo por sinta den bo cas, y mira grabacion casi en vivo, e efecto di
misil y bom cu ta wordo tira ocasionando morto, crueldad y temor den paisnan.
Y tur esaki ta indica na nos cu , awor mas cu nunca nos mester gara na Cristo Hesus, pasobra Su
binida ta serca y ta solamente den Cristo nos tin refugio.
Y e palabra di Dios ta recorda nos lo siguiente:
Mi carni y mi curason por faya,ma Dios ta e fortaleza di mi curason, y mi porcion pa semper.( Salmo
73:26).
Pesey laga nos aserca e trono di gracia cu confiansa, pa nos por ricibi misericordia y haña gracia pa
yuda den tempo di necesidad.( Hebreonan 4:16).
Pasobra tur loke a wordo scirbi prome aya, a wordo scirbi pa nos instrucion, pa door di perserverancia
y e encurashamento di Scrituranan nos por tin speransa.
Awor cu e Dios di perserverancia y di encurashamento concede pa boso ta di acuerdo cu otro segun
Cristo Hesus, pa di un acuerdo , boso den un solo bos, por glorifica e Dios y Tata di nos Señor Hesus
Cristo.( Romanonan 15:4-5-6).
Pesey den e tempo cu nos ta bibando nos mester ta alerta pa esaki:
Tene cuidao pa boso curason, no ta carga pa causa di paranda,y buracheria, y e preocupacionnan di
bida,y e dia ey no bini diripiente riba boso manera un trampa, pasobra e lo bini riba tur esnan cu ta
biba riba superficie di henter mundo.Ma sea alerta,tur ora bay,haciendo Oracion,pa boso por tin forsa
pa scapa di tur e cosnan aki cu ta bay tuma lugar,y para dilanti di e Yiu di hende.( Lucas 21:34-36).
Nos mester busca Dios su presencia den tur locual nos ta haci, nos mester ta mas fiel y constant den
asuntonan di Dios, nos mester ta firme y loyal tur momento na Dios y su palabra, pasobra e dianan ta
dificil.Y e dia y ora di Su binida ningun hende no sa,
Dios ta nos yudansa pasobra den Juan 15:5 ta para scirbi: Ami ta e mata di wijndruif, boso ta e
ramanan,esun cu keda den Mi, y Ami den dje, esey lo duna hopi fruta, pasobra separa di mi boso no
por haci nada.
Nos refugio y speransa ta den Dios, sin Dios nos no por logra nada, no ta cumbini nos busca refugio
den material y den palabra di hende, pasobra tur esey lo ta temporal, pero laga nos wowona keda fiha
riba Cristo Hesus.
Laga nos cuida nos salbacion cu temor y temblor, y no laga nos wordo distrai pa bientonan di mundo,
cosnan cu ta hiba na promesa falso y palabra di mentira, cual ta e cosnan cu ta trece stancamento den
nos crecemento spiritual,y den e proposito di Dios pa nos bida.
Seguridad nos tin den Cristo Hesus kende a priminti cu E lo no bandona nos, ni tampoco laga nos
desampara, pasobra cu E bay prepara lugar pa nos, pa nos por ta hunto cun’E ( Juan 14:1-4).
Pesey laga somete nos mes na Dios den tur momento.
Sinceramente, Pastor Marcel Balootje.