Diahuebs mainta, parlamentario di Partido di Pueblo Arubano, AVP, mr. Arthur Dowers a acudi
personalmente na sede di Ministerio Publico pa haci entrega di un denuncia contra di
malversacion di fondo publico den Stichting Sportsubsidie Aruba (SSA).
Hunto cu liderazgo di partido a bin ta sigui e desaroyonan y a sinti e responsabilidad di moral,
como ciudadano y como representante di pueblo, pa tuma carta den e asunto. Obviamente, no
ta algo cu por laga e minister encarga, esta Endy Croes, haci ya cu esey no lo pasa nunca.
Croes, kende nunca Evelyn Wever-Croes mester a duna e cartera di enseñansa, ni mucho menos
di deporte door di su antecedente, mes a admiti cu placa a perde y den mesun rosea a tribi di
bisa cu e sospechoso “ta un persona bon studia y cu e curason na e luga corecto.”
Normal lo puntra Minister Croes ki curashi e tin pa hustifica di horta placa di pueblo, pero
despues ta corda cu esaki ta e mesun persona cu despues di coy placa for di Fundacion Lotto Pa
Deporte, e tabatin e curashi di lanta un caso contra nan tambe.
Mientrastanto no por mira e dolor cu hopi deportista ta pasa pa yega na fondo. E situacion aki
tin hopi dirigente deporte indigna y a pidi Parlamentario Dowers pa haci algo y den nomber di
tur atleta, mayor, ekipo, boluntario y organisacion deportivo, a duna oido na e peticion.
Asina mes Dowers a indica cu, mescos cu a yega di sosode den pasado, Ministerio Publico no
mester a warda te ora un hende haci denuncia, pasobra prensa local a publica suficiente prueba
pa cuminsa un investigacion riba nan mes. Por ehempel, tin rapport di ARA cu ta mustra riba e
echo cu e directiva di e fundacion no a tene nan mes na regla y cu esey caba, OM mester a
cuminsa un feitenonderzoek.
“Ta hopi tristo pa mira e decadencia cu tin riba nos pais. MEP ta bolbe mustra cu lo haci su
maximo esfuerso pa proteha su hendenan. Tin precedente den e diferente gate, manera
rijbewijs, paspoort y vacuna caminda tur hende, na luga di haya castigo, a haya recompensa,”
Dowers a declara pafo di OM.
No solamente tur envolvi mester paga e cen cu a horta, pero tambe mester tin consecuencia
penal y esey ta loke AVP kier wak. No por ta otro djis pasobra e sospechoso principal ta famia di
prome minister, liga na partido MEP y trahado di otro minister.
Dowers a sigui bisa cu “Esaki ta un ehempel di e Universidad di corupcion. No solamente bo ta
comet’e bo mes, pero bo ta promove corupcion tambe. Despues cu a horta den Lotto, a haya
promocion como minister. Kico ta bay ta e recompensa pa esunnan envolvi den e caso nobo aki?
Tempo aya a bay cu 3.5 miyon florin y nunca a castiga culpabel penalmente y pueblo no mester
acepta esey mas. Awo Ministerio Publico no por uza e excuus cu ningun hende a entrega
denuncia. Awo tin un denuncia aden.”
Maske e sospechoso bandona e pais ayera, ley mester por yega unda cu e ta. Loke ta importante
pa haci un investigacion drechi. Ya caba un biaha, ora cu AVP a tuma over, a haci inversion pa
salba Lotto. Si ta necesario, AVP t’ey atrobe pa bolter cos. Pero pueblo mester realisa cu no ta
tur ser humano ta central pa MEP; solamente friends and family ta central pa MEP.
AVP si lo bay tras di esunnan responsabel di e 300 miyon cu a regala CITGO, di esunnan den e
asunto di helicopter, y cu a cobra for di acuerdo cu Eagle LNG.
Parlamentario di AVP, mr. Arthur Dowers: Gabinete Wever Croes II no kier para e fiesta di friends & family di MEP
