E presensia di Miembro di Parlamento di Kòrsou, Gwendell Mercelina, Jr. (PNP) durante Prinsjesdag i e ‘Algemene Politieke Beschouwingen’ (Deliberashonnan Polítiko General) ta marka un logro históriko. E promé biaha aki, hasí posibel dor di invitashon di Miembro di ‘Eerste Kamer’ Jeroen Recourt (GL-PvdA), a ser selebrá ku rekonosementu kaluroso di Prins Constantijn (ku a kompañá Mercelina na Antigua pa e SIDS 2024 Conference) i palabranan di elogio i sosten di vários Miembro di Staten-General tokante e trabou di Mercelina (PNP) na Kòrsou. Asta Gobernador Lucille George-Wout tabata kontentu ku e momentu históriko aki.
Sinembargo, e momentu ta ser tapá pa e falta di atenshon pa e partinan Karibense di Reino den e Diskurso di Trono i e debatenan ku a sigui. Esaki ta pasando miéntras ku 2024 ta marka e di 70 aniversario di Statüt, un aña den kual mester buska pa mas konekshon. Maske e Diskurso di Trono a referí na bon gobernashon i stabilidat/seguridat estatal, tabata falta plannan konkreto pa fortalesé e lasonan i atendé e impakto dje medidanan di ousteridat, e Fondo Nashonal di Kresementu i otro reformanan riba e partinan Karibense di Reino.
Mercelina ta boga pa polítika inklusivo
“Desishonnan tumá na Den Haag tin konsekuensianan grandi pa e habitantenan di Kòrsou, Aruba i Sint Maarten, por ehèmpel den enseñanza i kuido,” segun Mercelina. “Nos mester boga pa un maneho ku ta benefisiá tur Hulandes, sin importá unda nan ta biba.” E ta enfatisá tambe e ròl di union ku deporte por hunga den Reino, manera atletismo, ‘zeilen’ i baseball, i ta boga pa invershon den programanan di deporte manera e Weganan di Reino.
Un yamada pa mas atenshon
“E presensia históriko aki ta un paso den bon direkshon, pero mester di mas brùg duradero,” segun Mercelina, kende na yüni 2024 tambe tabata e promé parlamentario Hulandes-Karibense ku a entregá un moshon tokante outonomia fiskal den Tweede Kamer. “Nos mester fortalesé e lasonan i traha huntu na un futuro kaminda tur parti di Reino ta prosperá.”
E yamada pa mas atenshon pa e paisnan Karibense den Reino ta birando mas fuerte, spesialmente den e aña di hubileo aki i despues di e diskulpa pa e pasado di sklabitut. Ta di spera ku e Gobièrnu nobo di Reino (Schoof I) ta tuma e yamada aki na serio i ta tuma pasonan konkreto pa fortalesé e lasonan i konstruí un futuro huntu.
